सिन्धुली । दुधौली नगर अस्पताल यति बेला चरम विवादमा छ । अस्पतालमा कार्यरत मेडिकल अधिकृतहरू, दुधौली नगरपालिका र अस्पताल व्यवस्थापनबीच विवाद चुलिँदा अस्पतालको सेवा नै प्रभावित बनेको छ । अस्पतालमा कार्यरत ३ जना मेडिकल अधिकृतहरूलाई बिना कारण जागिरबाट निष्कासन गरेपछि विवाद झनै चर्किएको छ । नगरपालिकाले हाल कार्यरत अन्य ३ जना डाक्टरहरूलाई समेत चरम दबाबमा राखेको र नियम संगत पाउनुपर्ने सेवा सुविधामा समेत विभेद गरेको पाइएको छ ।

अस्पतालमा कार्यरत डाक्टरहरूलाई माघ १ गतेदेखि लागु हुने गरि दुधौली नगरपालिकाका कार्यबाहक मेयर तथा अस्पताल विकास समितिका अध्यक्ष समेत रहेका चन्द्रकिशोर थारु र उनको नेतृत्वको समितिले सेवा नविकरण नगरेपछि विवाद बल्झिएको हो । समितिले पुस २४ गतेको निर्णय अनुसार अस्पताल व्यवस्थापन समितिले करार सेवामा नियुक्त गरेका डाक्टरहरु सन्तोष पञ्जियार, पुरुषोत्तम बराल र हिमाल गौतमको करार सेवा नविकरण गरेको थिएन । उनीहरुलाई कार्यसम्पादन मुल्यांकन सन्तोषजनक नभएको भन्दै नविकरण नगर्ने अस्पताल प्रशासनले निर्णय गरेको थियो । अस्पतालका डाक्टरहरुको करार सेवा नविकरण नभएपछि विवाद झनै चर्किँदै गएको छ ।

अस्पतालमा कार्यरत बाँकी रहेका ३ जना मेडिकल अफिसरले मात्र अस्पतालको ओपिडी सेवा, आपतकालिन सेवा लगायतका सेवा सञ्चालन गर्न नसक्ने भएपछि बिहीबार अस्पताल प्रशासनले सूचना जारी गरि शुक्रवारदेखि ओपिडी सेवा बन्द गरेको जनाएको छ ।

शुक्रवारदेखि ओपिडी सेवा बन्द भएपछि दैनिक १ सय देखि १ सय ५० जनासम्म विरामी आउने अस्पतालमा बिरामीहरूले सेवा पाउनबाट वञ्चित भएका छन् । अस्पतालमा हाल कार्यरत ३ जना मेडिकल अफिसर छन् । डा. रमा खपांगी, डा. मन्दिप अधिकारी र डा. मनिष कार्कीले २४ सै घण्टा सेवा सञ्चालन गर्न नसक्ने जनाएपछि अस्पताल प्रशासनले ओपिडी सेवा बन्द गरेको हो ।

यता अस्पताल व्यवस्थापन समितिको अध्यक्ष रहेका दुधौली नगरपालिकाका कार्यवाहक मेयर चन्द्रकिशोर थारुले समितिबाट राजीनामा दिएका छन् । उनले राजीनामा दिएपछि नगरपालिकाका प्रवक्ता समेत रहेका दीपक खड्का शनिवार अस्पताल विकास समितिको अध्यक्ष बनेका छन् ।

नवनियुक्त अध्यक्ष खड्काले अस्पतालमा स्वास्थ्यकर्मीहरूले राजनीति गरेको आरोप लगाएका छन् । उनले स्वास्थ्य सेवा सञ्चालनका लागि दुई जना डाक्टर खोजेर ल्याउने तयारी गरेको बताएका छन् ।

यता अस्पतालमा कार्यरत मेडिकल अफिसरहरूलाई नगरपालिकाले हटाउने तयारी सुरु गरेको खुलेको छ । कार्यपालिका बैठकमा सहमति जुटाउन सकेमा थप ३ जना डाक्टरहरु समेत हटाउन मेयर थारु आफै क्रियाशील रहेको नगरपालिका श्रोतले जानकारी दिएको छ । करार सेवामा रहेका ३० जना भन्दा बढी स्वास्थ्यकर्मीलाई साउनदेखि दोब्बर तलब तथा सेवा सुविधा बढाएको अस्पतालले मेडिकल अफिसरहरूलाई तलब वृद्धि नगरेको, थप सेवा सुविधा नदिएको भन्दै उनीहरू आन्दोलित भएका थिए । उनीहरू असोज देखि नै आफ्नो अधिकारका लागि सङ्घर्षरत थिए । त्यही सङ्घर्षरत डाक्टरहरूलाई अस्पतालले माघ १ गतेदेखि जागिरबाट निष्कासन गरेको हो ।

त्यही आन्दोलनपछि अस्पतालका डाक्टर र अस्पताल विकास समितिको विवाद झनै चुलिएको थियो । असोजमा चिकित्सकको नियमित सेवा, जोखिम र जिम्मेवारी, कार्यसम्पादन सम्बन्धी ६ बुँदे माग राखेका डाक्टरहरु अहिले अस्पताल व्यवस्थापन समिति र नगरपालिकाको तारो बनेका छन् । उनीहरूले जनप्राक्टिस भत्ता, सर्प दंश उपचार भत्ता, प्रोत्साह भत्ता, महँगी भत्ता र गत वर्षको ओभर टाइम ड्युटीको बाँकी बक्यौता भुक्तानीको माग समेत गरेका थिए । डाक्टरहरूले अघिल्लो आर्थिक वर्षको ओभर टाइम बक्यौता समेत भुक्तानी नभएको जनाएका छन् ।

मेडिकल अधिकृतहरूले असोजमा राखेको माग पुरा नभएपछि मङ्सिर १ गतेदेखि केही दिन अस्पतालको ओपिडी सेवा बन्द गराएका थिए । अस्पतालले पटक पटक आफूहरूका माग पुरा गर्ने आश्वासन दिने र बेवास्ता गर्ने गरेको अस्पतालका मेडिकल अफिसर इन्चार्ज रमा खपांगीले बताइन् ।

उनले पछिल्लो समय डाक्टरहरुको विना कारण, विना जानकारी र स्पष्टीकरण समेत दिने अवसर नदिई करार सेवा नविकरण नगर्नु, निरन्तरता उठाएका डाक्टरहरूका मागको बेवास्ता गर्नु, सेवा सुविधामा विभेद गर्नु र अस्पतालमा कामको चाँप अत्यधिक भएको हुँदा सेवा दिन समस्या भएको बताएकी छिन् । अस्पताल प्रशासन र मेडिकल अफिसरका बीचमा भएको विवादका कारण काम गर्ने मनोबल र उत्साह समेत हराउँदै गएको उनले बताइन् । निर्वाचन आचारसंहिता लागेकाले तत्काल डाक्टर आउन सक्ने सम्भावना पनि न्यून रहेको उनले बताएकी छिन् ।

अस्पतालमा कार्यरत डा. मन्दिप अधिकारीले जनशक्ति कम भएकाले अस्पतालको ओपिडी सेवा सञ्चालन गर्न नसकिएको बताएका छन् । तीन जना डाक्टरले ओपिडीका डेढ सय र आपतकालिन सेवा लिन आउने ४०, ५० जना विरामी तीन जनाले हेर्न नसक्ने बताएका छन् । उनका अनुसार अस्पतालको आपतकालिन सेवा र ७० वर्ष माथिका नागरिकलाई सेवा नरोकिएको बताएका छन् । दुधौली नगरपालिकाका कार्यबाहक मेयर चौधरीले दुधौली अस्पतालको विषयमा बोल्न चाहेनन् ।

अस्पताल विवादमा मुछिएपछि दुई जना विशेषज्ञ डाक्टरहरु समेत बिदामा बसेका छन् । यता अस्पतालको विवाद चुलिएपछि र अख्तियारमा नियम बमोजिम भन्दा अत्यधिक सेवा सुविधा लिएको भन्दै दुधौली अस्पतालका प्रमुख डा. सुमनसिंह कार्की विरुद्ध अख्तियारमा मुद्दा चलिरहेको छ । उनी विरुद्ध बिमाको औषधि र निःशुल्क औषधिमा अनियमितता गरेको, निःशुल्क औषधि विक्री वितरण गरेको समेत आरोप लागेको छ । डा. कार्कीले अस्पतालबाट मासिक तलब, ७५ प्रतिशत विशेषज्ञ भत्ता र २५ प्रतिशत प्रोत्साहन भत्ता लिएको आरोप छ । अख्तियारले छानबिनका लागि अस्पतालको दस्ताबेजहरू लगिसकेको छ ।

अस्पतालले अस्पतालभित्रका विवादहरूको अध्ययन गर्न छानबिन समिति समेत बनाएको छ । जनस्वास्थ्य कार्यालय सिन्धुलीका प्रमुख बिमल पट्टेल, स्थानीय राजनीतिक दलका प्रतिनिधि सहितको छानबिन समितिले प्रतिवेदन दिन सकेको छैन ।

सम्बन्धित समाचार

अन्तरिम सरकारका ४ मन्त्री चुनावी मैदानमा प्रतिनिधिसभा निर्वाचनमा उम्मेदवारी दर्ता गराएका पाँच जना विरुद्ध उजुरी डोल्मा फन्डको राजश्वमा जेनजी सरकारको चलखेल हाइप्रोफाइल भीडन्त : ‘ढुक्क’को छैन ५ भावी प्रधानमन्त्रीका दावेदारको क्षेत्र उम्मेदवार चयनसँगै बढ्यो चुनावी गीत सिर्जनाको चाप जमलमा तीन वटा सवारी आपसमा ठोक्किएर दुर्घटना एमालेले घोषणापत्र फागुनको सुरुवातमै सार्वजनिक गर्ने बाचा गर्ने दल गायब, भरपाई कोसँग माग्ने ?