राजविराज । कुनै बेला इनारै इनार र पोखरीले भरिभराउ गाउँको रूपमा परिचित सप्तरीको विष्णुपुर गाउँपालिका–२ सिम्रहा गाउँ अहिले पोखरी र इनारविहीन गाउँको रूपमा परिणत हुन थालेको छ ।

यसको प्रमुख कारण बनेको छ, स्थानीय केही व्यक्तिद्वारा भइरहेको अतिक्रमण । गाउँलेका अनुसार यस गाउँमा सुरुमा ४२ वटा सार्वजनिक पोखरी र करिब दुई दर्जन इनार थिए । तर अतिक्रमणको चपेटामा पर्दै गएपछि पोखरी घटेर अहिले २०–२१ को संख्यामा पुगेको छ । यस्तै अवस्था इनारको पनि रहेको छ ।

अतिक्रमणमा परेर अहिले इनारको संख्या पनि एक दर्जनमा सीमित हुन पुगेको छ । स्थानीयवासी नवलकिशोर यादवका अनुसार पोखरी र इनार अतिक्रमण गरी मासिँदै गएपछि गाउँको सौन्दर्यीकरण पनि घट्दै गएको छ ।

पछिल्लो समय गाउँको ऐतिहासिक वीरबल पोखरी पनि अतिक्रमणको चपेटामा परेको स्थानीयवासी शत्रुघन ठाकुरले बताए । उनले सो पोखरीमा विगतमा गाउँलेहरू नुहाउने, पशु चौपायालाई पानी खुवाउने, आगलागीका बेला पानी निकाल्ने तथा छठ पर्वका बेला घाट बनाई पूजापाठलगायतका कार्य हुने गरेको थियो । तर अहिले पोखरीमा माटो भर्दै तथा पोखरी डिलमा केही स्थानीय व्यक्तिले कब्जा गरी घर निर्माण गर्दा ती सबै कार्य प्रभावित भएको छ ।

अर्का स्थानीयवासी सत्यनारायण बाबाले यसरी गाउँको सौन्दर्यता तथा मौलिकता नै लोप हुने गरी सार्वजनिक पोखरी र इनार अतिक्रमण गर्ने तथा मास्ने कार्य तीव्र बनेपछि केही जागरूक युवा विरोधमा उत्रेको बताए ।

उनले पछिल्लो पटक वीरबल पोखरीको डिलको जग्गा अतिक्रमण गर्ने किसन ठाकुर, पलट ठाकुर, विन्देश्वर ठाकुर र दिनेश ठाकुरलगायतका व्यक्तिउपर सप्तरी जिल्ला अदालतमा मुद्दा नै चलेको बताए ।

कतै कुनै सुनुवाइ नभएपछि आफूहरूले ती व्यक्तिउपर सार्वजनिक ऐलानी पोखरी डिल जग्गाको अतिक्रमण खिचौला मेटाई घर उठाई चलन मुद्दा चलाएको उनको भनाइ छ ।

उनले सार्वजनिक पोखरीमा माटो भर्ने र डिलमा रहेको जग्गामा भवन निर्माण गर्न थालेपछि विरोध गर्दा उल्टै ती व्यक्तिबाट दुव्र्यवहार र हातपात भएको सुनाए ।

स्थानीयवासीहरुका अनुसार ठाकुर परिवार र केही अन्य व्यक्तिले कित्ता नं. ४४९ भित्रको सो पोखरीको डिलको अधिकांश जग्गा कब्जा गरी पक्की भवन नै निर्माण गरिसकेका छन् । उनीहरूको देखासिकी केही थप व्यक्तिहरूले पनि बाकी रहेको जग्गा घेरवार गर्दै घर भवन निर्माण गर्ने तयारीमा जुटेको स्थानीयवासी जलेश्वर ठाकुरले बताए ।

स्थानीयका अनुसार अतिक्रमणकारीहरूले अदालतको आदेशविपरीत सार्वजनिक पोखरीको जग्गा मास्ने र अतिक्रमण गर्ने कार्यलाई निरन्तरता दिएपछि अहिले अदालतको आदेशको अवज्ञा गरेको भन्दै अवहेलनाको अर्को मुद्दा पनि हालिएको छ । सार्वजनिक जग्गाको संरक्षण गर्नुपर्नेमा सरोकारवाला निकाय मौन बसिरहँदा अतिक्रमणकारीको मनोबल बढ्दै गएको भन्दै स्थानीयले अविलम्ब ऐतिहासिक पोखरीमा भएको कब्जा खिचौला मेटाई र घर उठाई गरी गाउँको मौलिकता जोगाउन र सार्वजनिक सम्पत्तिको रक्षा गरिनु पर्ने माग गरेका छन् ।

सम्बन्धित समाचार

गर्मी छल्न विद्यालयहरू धमाधम बन्द गरिँदै लालपुर्जा माग्दै १९ दिनदेखि नगरवासीद्वारा धर्ना वीरगञ्जका मेयर सिंहविरुद्ध भ्रष्टाचार मुद्दा रवि लामिछानेविरुद्धको संगठित अपराध अभियोग संशोधन गर्न पर्सा अदालतको अनुमति उपसचिव सुरेशबाबु महिनौं बेपता हुँदा समेत मन्त्री प्रतिभा किन मौन ? पश्चिम नवलपरासीका किसान रोपाइँमा व्यस्त रास्वपा मधेश प्रदेश जिल्ला अधिवेशन पर्साको मात्र सम्पन्न बैंकिङ कसुरमा वडाध्यक्ष महतो पक्राउ