पोखरा । पोखरा महानगरपालिकाको मेयरमा एकीकृत समाजवादीका धनराज आचार्यले मतान्तर बढाउँदै १८ सय पु¥याएका छन् ।
बुधबार बिहानसम्म ३४ हजार ६ सय १३ मतगणनामा आचार्यले १४ हजार ३ सय ६२ र नेकपा एमालेका कृष्ण थापाले १२ हजार ५ सय १७ मत प्राप्त गरेका छन् । दुवै बीचको अन्तर १ हजार ८ सय ४५ पुगेको छ ।
गएरातिसम्म दुबैबीच १५ सय हाराहारीको अन्तर थियो । राप्रपाका शंकर खरालले १ हजार ४ सय ८३, स्वतन्त्रका गनेस पौडेलको ८ सय १५ छ ।
उपमेयरमा भने प्रतिस्पर्धा कडा छ । सत्ता गठबन्धनबाटै नेपाली कांग्रेसकी उम्मेदवार कोपिला रानाभाटले १४ हजार ६ सय ८५ र एमालेकी मञ्जुदेवी गुरुङले १४ हजार २ सय ७५ मतसहित पछ्याएकी छन् । दुबै बीचको अन्तरि ४ सय १० मात्र छ । राप्रपाकी रञ्जना सेनको १२ सय ६३ छ ।
स्थानीय तह निर्वाचनअन्तर्गत शुक्रबारको मतदानमा पोखरा महानगरपालिकामा २ लाख ७ हजार मतदातामध्ये १ लाख ४३ हजार मत खसेको थियो ।
