स्थानीय निर्वाचन सकिएर जनप्रतिनिधिले कार्यभार सम्हालिसकेपछि पनि काठमाडौं महानगरपालिकाको फोहर उठ्न नसक्दा राजनीतिक दल तथा तिनका शीर्ष नेतृत्वमाथि जनताले प्रश्न उठाउँदै गर्दा मंगलबारदेखि बन्चरेडाँडा डम्पिङ साइटमा फोहर लैजाने सहमति जुटेको छ । काठमाडौंको फोहोर उठ्ने भएपछि उपत्यकाका जनतामा खुसीको भाव सञ्चार हुन गएको छ । लामो समयसम्म फोहोर थुप्रिँदा हैजाजस्तो महामारी आउने पो हो कि भनी त्रसित काठमाडौंवासीका मनमा अहिले केही शान्ति र आशाले ठाउँ पाएको छ । सहरी विकास मन्त्रालयमा सम्पन्न वार्तामा स्थानीय जनताका माग सम्बोधन गर्नेगरी फोहोरमैला व्यवस्थापन गर्ने सहमति भएपछि अब राजनीतिक दलले सहमति नदिँदा पो फोहर उठेन कि भन्ने आशंका पनि निवारण भएर गएको छ । यता काठमाडौंमा फोहर उठ्ने र उता बन्चरेडाँडाका स्थानीय जनतासँग गरिएका सहमतिअनुसारका काम कार्यान्वयन गर्ने कुरा एकसाथ अघि बढाइनुपर्छ । ताकि यो सहमतिकार्यान्वयनमा आशंका र ढिलासुस्ती पैदा हुन नजाओस् । सरकारी पक्ष र सिसडोल तथा बन्चरेडाँडाका जनप्रतिनिधिबीच भएको सहमति कार्यान्वयनको दिशामा विना व्यवधानअघि बढ्न सकोस् ।
काठमाडौंमा थुप्रने फोहर होस् वा बन्चरे डाँडा र सिसडोलमा बिसर्जन गरिने फोहर होस्, यो फोहर र यसको दुर्गन्धले स्थानीय जनता र त्यहाँको वातावरणमा पार्ने प्रभाव कहिंकतै र कसैका लागि पनि निकै गम्भीर र सोचनीय कुरा हो । जन स्वास्थ्यको अवस्था जहाँका जनताको पनि उही नै हो । त्यसको असर र प्रभाव सिंगो नेपाली जनस्वास्थ्य माथिको आघात हो । त्यो सबै नेपालीको स्वास्थ्य माथिको गम्भीर समस्या पनि हो । त्यसैले पनि हरेक दिन बन्चरेडाँडाको डम्पिङ साइटमा फोहोर खसालेपछि १५ सेन्टिमिटर उचाइको माटोले पुर्नुपर्ने सहमति आवश्यक र वैज्ञानिक दुवै हो । बाक्लो माटोको पत्रले फोहर पुरेपछि दुर्गन्ध नफैलिने मात्र होइन, उक्त फोहरबाट विषाणु पनि बस्तीबस्तीमा पुग्न सक्दैन । यसले स्थानीय जनताको जनस्वास्थ्यमा पुग्ने हानी र नोक्सानीबाट बचाउँछ । यसका साथै साउन १ देखि लागू हुनेगरी कुहिने र नकुहिने खालका फोहोरको वर्गीकरण गरी नकुहिने फोहर मात्र डम्पिङ साइटमा लैजाने भनी गरिएको सोच र सहमतिले काठमाडौंको फोहर व्यवस्थापनमा नयाँ अध्याय पनि सुरु गर्ने देखिएको छ ।
सहमतिको मर्मअनुसार काठमाडौं महानगरवासीले हरेक घरमा कुहिने र नकुहिने फोहोर छुट्टाछुट्टै पोको बनाएर छुट्याई राख्नुपर्ने छ । महानगरले कुहिने र नकुहिने फोहोर छुट्टाछुट्टै गाडी पठाएर संकलन गर्ने र त्यसको उचित बिसर्जन र व्यवस्थापन समेत गर्ने सहमतिमा जनाइएको छ । महानगरको कुहिने फोहोरबाट कम्पोस्ट मल बनाउने भएपछि सिसडोल तथा बन्चरेडाँडामा कुहिने पदार्थले पारेको असर निकै कम र अन्त्य हुन गई त्यहाँका स्थानीय जनताको जनस्वास्थ्यमा लाभ हुन जाने देखिएको छ । वार्तामा संघीय तथा स्थानीय जनप्रतिनिधि दुवै पक्षका रूपमा सहभागी भएकाले अहिलेको वार्तामा भएका सहमति कार्यान्वयनको तहमा जाने सबैको आशा रहेको छ । शिक्षा, स्वास्थ्य, रोजगार, स्वास्थ्य बिमालगायतका कुरामा गरिएको सहमतिले स्थानीय जनतामा भरपुर आशा र विश्वास पैदा पनि भइसकेको छ । त्यसको कार्यान्वयनको आभाष काठमाडौं महानगरपालिकामा फोहर उठ्न थालेदेखि नै फोहर बिसर्जन गरिने ठाउँका स्थानीय जनतामा हुन थाल्नुपर्छ । त्यसैले व्यावहारिक विश्वासका साथ शीघ्र फोहर व्यवस्थापन गर ।
