भोजपुर । भोजपुरमा शैक्षिक अनुसन्धान केन्द्र शिक्षक भवनको शिलान्यास गरिएको छ । शैक्षिक क्षेत्रको खोज तथा अनुसन्धान गर्ने लक्ष्यले भोजपुर नगरपालिका ८ पोखरेमा भवनको शिलान्यास गरिएको हो ।

नेपाल राष्ट्रिय शिक्षक संगठन जिल्ला समितिले निर्माण थालेको भवनको कोशी प्रदेशका पूर्वमूख्यमन्त्री तथा नेकपा(एमाले) स्थायी कमिटी सदस्य शेरधन राई र कोशी प्रदेश राज्यमन्त्री सिर्जना राईले संयुक्त रुपमा शिलान्यास गरेका हुन् ।

भवन निर्माणको लागि कोशी प्रदेश सरकारले रु २५ लाख र स्थानीय पालिकाबाट १४ लाख ५० हजार बजेट विनियोजन भएको राष्ट्रिय शिक्षक संगठन जिल्ला समिति भोजपुरका अध्यक्ष ध्रुवराज रेग्मीले जानकारी दिए । यो भवनबाट जिल्लाको शैक्षिक अवस्था तथा नविनतम विषयबस्तुको खोज तथा अनुसन्धान गरिने अध्यक्ष रेग्मीको भनाइ छ ।

‘शैक्षिक क्षेत्रको विकास तथा खोज अनुसन्धान गर्ने लक्ष्यले शैक्षिक अनुसन्धान केन्द्र शिक्षक भवनको शिलान्यास गरेका छौँ’ अध्यक्ष रेग्मीले भने,‘भवन निर्माणको लागि प्रदेश सरकारसँगै स्थानीय पालिकाहरुको बजेटमा निर्माण थालेका छौँ । शिक्षहरुबाट पनि स्वतःस्फूर्त रुपमा रकम संकलन गरिरहेका छौँ ।’

अनुसन्धान केन्द्र शिक्षक भवन निर्माणको लागि पौवादुङमा गाउँपालिकाबाट रु. तीन लाख, टेम्केमैयुङ गाउँपालिकाबाट दुई लाख ५० हजार, भोजपुर नगरपालिका, षडानन्द नगरपालिका र अरुण गाउँपालिकाबाट दुई÷दुई लाख, हतुवागढी, आमचोक र साल्पासिलिछो गाउँपालिकाबाट एक÷एक लाख गरी पालिकाहरुबाट रु.१४ लाख ५० हजार बजेट विनयोजन भएको जनाइएको छ ।

संगठनको नाममा रहेको तीन रोपनी, एक आना तीन पैसा क्षेत्रफलमा भवन निर्माण थालिएको संगठनका सचिव विष्णुकुमार राईले बताए ।

भवनको शिलान्यास गर्दै पूर्व मूख्यमन्त्री तथा एमाले स्थायी कमिटी सदस्य शेरधन राईले अनुसन्धान केन्द्र शिक्षक भवनले यहाँको शैक्षिक विकास तथा खोज अनुसन्धानमा सहयोग पुग्ने बताए । सामुदायिक विद्यालयहरुको खस्किदो शैक्षिक अवस्थाको सुधारसँगै भोजपुरबाट उत्पादित जनशक्तीलाई सक्षम र सफल बनाउन भवनको प्रयोग हुनु पर्नेमा उनले जोड दिए ।

‘शैक्षिक सुधारको लागि एक ऐतिहासिक कामको थालनी भएको छ’उनले भने,‘यो भवनलाई शैक्षिक सुधारको अनुसन्धान केन्द्रको रुपमा विकास गर्नु पर्छ । हामीले दक्ष शैक्षिक जनशक्ति उत्पादनमा जोड दिन अवश्यक छ । यसले जिल्लाको समग्र शैक्षिक सुधारमा अग्रनी भूमिका खेल्नेमा आशावादी छु ।’

कोशी प्रदेश राज्यमन्त्री सिर्जना राईले कोशी सरकारले योजनाबद्ध विकासमा जोड दिएको बताइन् । जिल्लामा एउटा शैक्षिक अनुसन्धान केन्द्रको अवश्यकता रहेको ठहर गरेर प्रदेश सरकारले भवन निर्माणको लागि बजेट विनियोजन गरेको उनको भनाइ छ ।

कोशी प्रदेश सरकारले प्राथमिकताका साथ अघि बढाएका योजनाहरुलाई समयमा सम्पन्न गराउन आवश्यक पहल कदमी गरिरहेको राज्य मन्त्री राईले जानकारी दिइन् । पौवादुङमा गाउँपालिका अध्यक्ष किरण राईले शैक्षिक अनुसन्धान केन्द्र निर्माणको लागि गाउँपालिकाले पनि आवश्यक सहयोग गरेको बताए । भवन निर्माणले शैक्षिक क्षेत्रको खोज तथा अनुसन्धानमा टेवा पुग्ने राखे ।