खोटाङ । भूमि समस्या समाधान आयोग जिल्ला समिति खोटाङले आफ्नो हालसम्मको कामको विवरण सार्वजनिक गरेको छ । आयोगका निर्वतमान अध्यक्ष निर्मल राईले जिल्ला समन्वय समितिको सभाहलमा सोमबार पत्रकार सम्मेलनको आयोजना गर्दै कामको विवरण सार्वजनिक गरेका हुन् ।

आयोगले उपलब्ध गराएको तथ्यांक अनुसार खोटाङमा हालसम्म भूमिहीन दलितका ६२ जना, भूमिहीन सुकुम्बासीका १ सय ६१ जना र अव्यवस्थित बसोबासीका ९ सय २८ जना गरी जम्मा १ हजार १५१ जनाको दर्ता सम्पन्न भएको जानकारी दिईएको छ ।

प्रमाणिकरणतर्फ भूमिहीन सुकुम्बासी दलित २ जना र हलेसी तुवाचुङ नगरपालिका वडानम्बर–७ का भूमिहीन सुकुम्बासी ३ जना, वडानम्बर–८ र १० का अव्यवस्थित बसोबास ३७ जनाको प्रमाणिकरणको काम सकिएको अध्यक्ष राईले जानकारी दिए । अध्यक्ष राईले सरकारले भूमि व्यवस्था ऐन तथा सुकुम्बासी तथा अव्यवस्थित बसोबासी ऐनअनुसार काम अगाडि बढाइरहेको अवस्थामा आयोग खारेज गरिएकोमा असन्तुष्टि व्यक्त गरे ।

अध्यक्ष राईले विस्थापित सुकुम्बासीको पक्षमा सरोकार पक्ष सबैको ध्यानाकर्षण गराउदै वर्तमान सरकारले भूमि समस्या समाधान आयोग खारेज गरी देशभरका सुकुम्बासीको घरआँगनमा डोजर चलाएर अमानवीय गतिविधि गरिरहेको बताए । आयोग खारेज भएपछि काम गर्न नसक्ने अवस्था भए पनि हालसम्म खोटाङ जिल्लामा भएका कामहरू पत्रकार सम्मेलनमार्फत सार्वजनिक गरिएको स्पष्ट पारे ।

पत्रकार सम्मेलनमा आयोगका विज्ञ सदस्य विष्णुराज राई र सदस्य दिल कुमारी राईको समेत उपस्थिति रहेको थियो ।

सम्बन्धित समाचार

पहिचानको खोजीमा आठपहरिया समुदाय : आदिवासी जनजातिमा सूचीकरणको माग सुन्दरहरैचामा सुकुम्बासीमाथि डोजर नचलाउन स्थानीय सरकारलाई सभापति तामाङको आग्रह हराएको खुकुरी खोज्न गएका २ को भीरबाट खसेर मृत्यु सुन्दरहरैंचा नगरप्रमुख केदारप्रसाद गुरागाई सुकुम्बासीको पक्षमा उभिने पूरा हुँदै कृष्णबहादुरको सपना किर्ते कागजात तयारी पारि वन कर्मचारीकै मिलेमतोमा खयर तस्करी मेची–महाकाली राष्ट्रिय उद्धार यात्रा–२०८३ को थालनी फरार प्रतिवादी पक्राउ गर्न लेटाङ प्रहरी सक्रिय