फिफा विश्वकप २०२६ को तेस्रो स्थानका लागि भएको खेलमा इंग्ल्यान्डले फ्रान्सलाई ६–४ ले पराजित गरेको छ। निकै रोमाञ्चक बनेको खेलमा इंग्ल्यान्डका बुकायो साकाले ह्याट्रिक गरे भने फ्रान्सका किलियन एम्बाप्पे विश्वकप इतिहासकै सर्वाधिक गोलकर्ता बने।
दुवै टोलीको लक्ष्य विश्वकप उपाधि जित्ने भए पनि सेमिफाइनलमा हार बेहोरेपछि तेस्रो स्थानका लागि प्रतिस्पर्धा गरेका थिए। फ्रान्स स्पेनसँग २–० ले पराजित भएको थियो भने इंग्ल्यान्ड अर्जेन्टिनासँग अन्तिम समयमा हार्दै फाइनल पुग्न असफल भएको थियो।
मियामीको अत्यधिक गर्मीमा भएको खेलका लागि दुवै प्रशिक्षकले टोलीमा धेरै परिवर्तन गरेका थिए। इंग्ल्यान्डका प्रशिक्षक थोमस टुचेलले ह्यारी केन र जुड बेलिङ्घमलाई सुरुआती टोलीमा राखेनन्। फ्रान्सका प्रशिक्षक डिडिएर डेसाँले पनि ब्राडली बार्कोला र उस्मान डेम्बेलेलाई सुरुदेखि मैदानमा उतारेनन्।
खेलको तेस्रो मिनेटमै डेक्लान राइसले टाढाबाट आकर्षक गोल गर्दै इंग्ल्यान्डलाई अग्रता दिलाए। त्यसपछि एज्री कोन्साले हेडमार्फत गोल गर्दै अग्रता २–० बनाए। फ्रान्सका एम्बाप्पे र माइकल ओलिसेले लगातार अवसर सिर्जना गरे पनि इंग्ल्यान्डका गोलरक्षक डिन हेन्डरसन उत्कृष्ट प्रदर्शन गर्दै गोल हुन दिएनन्।
त्यसपछि इंग्ल्यान्डले तीव्र काउन्टर आक्रमणमा बुकायो साकामार्फत तेस्रो गोल गर्यो। पहिलो हाफको इन्जुरी समयमा साकाले व्यक्तिगत दोस्रो गोल गर्दै इंग्ल्यान्डलाई ४–० को बलियो अग्रता दिलाए।
पहिलो हाफको खराब प्रदर्शनपछि फ्रान्सका प्रशिक्षक डेसाँले त्यसलाई “विनाशकारी” भन्दै दोस्रो हाफमा चार खेलाडी परिवर्तन गरे। उनले उस्मान डेम्बेले, डायोट उपामेकानो, लुकास डिन्ये र ब्राडली बार्कोलालाई मैदानमा पठाए।
परिवर्तनको प्रभाव तुरुन्तै देखियो। एम्बाप्पेले प्रतियोगिताको नवौं गोल गर्दै फ्रान्सका लागि पहिलो गोल फर्काए। यससँगै उनले गोल्डेन बुट दौडमा लियोनेल मेसीलाई पछि पारे।
त्यसपछि बार्कोलाले अर्को गोल गर्दै फ्रान्सलाई खेलमा फर्काउने प्रयास गरे। केहीबेरपछि एम्बाप्पेले ओलिसेको पासमा अर्को गोल गर्दै विश्वकप इतिहासमा सबैभन्दा धेरै २२ गोल गर्ने खेलाडी बने। यससँगै उनले यस विश्वकपमा सर्वाधिक गोलकर्ताको दौडमा पनि मेसीभन्दा दुई गोलको अग्रता बनाए।
फ्रान्सले बराबरी गर्ने केही राम्रो अवसर गुमायो। त्यसपछि मालो गुस्टोले डिजेड स्पेन्सलाई पेनाल्टी क्षेत्रमा लडाएपछि इंग्ल्यान्डले पेनाल्टी पायो। साकाले पेनाल्टीलाई गोलमा परिणत गर्दै आफ्नो ह्याट्रिक पूरा गरे।
खेलको अन्त्यतिर डेम्बेलेले फ्रान्सका लागि चौथो गोल गरे। तर त्यसको केहीबेरमै जुड बेलिङ्घमले व्यक्तिगत उत्कृष्ट प्रयासमा गोल गर्दै इंग्ल्यान्डको छैटौं गोल गरे। योसँगै बेलिङ्घम विश्वकपमा सात गोल गर्ने पहिलो इंग्लिस खेलाडी बने।
तेस्रो स्थान हासिल गर्दै इंग्ल्यान्डले सन् १९६६ मा विश्वकप जितेपछि पहिलोपटक विश्वकपमा आफ्नो उत्कृष्ट नतिजा हासिल गरेको छ। यद्यपि सेमिफाइनलमा साविक विजेता अर्जेन्टिनासँगको हार उनीहरूका लागि अझै पीडादायी सम्झना बनेको छ।
फ्रान्सका प्रशिक्षक डिडिएर डेसाँले सन् २०१८ मा टोलीलाई विश्वकप जिताएका थिए भने २०२२ मा उपविजेता बनाएका थिए। विश्वकप २०२६ को उपाधिको प्रमुख दाबेदार मानिएको फ्रान्स भने सेमिफाइनलमा स्पेनसँग २–० ले पराजित हुँदै बाहिरिएको थियो।
अब विश्वकप २०२६ को फाइनलमा तीन पटकको विश्वविजेता अर्जेन्टिना र युरोपियन च्याम्पियन स्पेनबीच आइतबार न्यु जर्सीको इस्ट रदरफोर्डमा उपाधिका लागि प्रतिस्पर्धा हुनेछ।
