काठमाडौं । बोल माया …बोलको गीत गाएर चर्चामा आएका गायक प्रकाश सपुत अब नायकको भुमिकामा देखिने भएका छन् ।
विभिन्न म्युजिक भिडियोमा नायकको भुमिका निर्वाह गरे पनि चलचित्रमा पहिलो पटक नायकको भुमिका निर्वाह गर्न लागेका हुन् । नारायण रायमाझीले निर्देशन गर्ने चलचित्र ‘परदेशी २’प्रकाश नायक र वर्षा शिवाकोटीले नायिकाको रुपमा अनुबन्ध भएका छन् । उक्त चलचित्रको सुटिङ शुक्रवारदेखी सुरु भएको छ ।
प्रकाशले फेशबुकमा स्टाटस लेख्दै चलचित्रको प्रदर्शन मिति आउँदो बर्षको दशैंलाई तोकिएको जनाएका छन् । प्रकाशले चलचित्रको छायांकन सुरु हुँदै गर्दा आफूलाई खुशी, डर र उत्साह सबै रहेको बताएका छन् ।
चलचित्र ‘परदेशी’को सिरिजको रुपमा तयार हुन लागेको यो चलचित्रले वैदेशिक रोजगारीको कथालाई उठान गर्नेछ । ‘परदेशी २’ले समेत आउँदो बर्षको दशैंलाई प्रदर्शन मिति तय गरेपछि आउँदो बर्षको दशैंमा चलचित्रको महाभिडन्त हुने देखिएको छ ।
