१० महिना पछि हल खोल्ने अनुमति, नयाँ फिल्मलाई बोर्डको सुविधा

काठमाडौं । कोरोना संक्रमणका कारण गत चैतबाट बन्द भएको सिनेमा हल अब खुल्ने भएको छ । आइतबार बसेको मन्त्रिपरिषद्को बैठकले सिनेमा हल खोल्ने निर्णय गरेको हो । सीसीएमसीले केही दिनअगाडि नै सरकारलाई सुरक्षा मापदण्ड अपनाएर सिनेमा भवन सुचारु गर्न दिनका लागि अनुरोध गरेको थियो । सीसीएमसीको सोही पत्रलाई आधारमा सरकारले हल खोल्ने अनुमति दिएको हो ।

कोरोना संक्रमणको कारण देखाई गत ११ चैत्रबाट सिनेमा हल नेपाल सरकारले बन्द गरेको थियो । अब सुरक्षा मापदण्ड अपनाएर चलचित्र घरमा सिनेमा देखाउन सकिने निर्णय मन्त्रिपरिषद्ले गरेको सञ्चार, सूचना तथा प्रविधिमन्त्री पार्वत गुरुङले बताएका छन् ।

फिल्म हल खोल्न पटकपटक पहल गर्दा पनि सरकारले नखोल्ने अनुमति नदिएपछि गत १० पुसबाट चलचित्र घर सञ्चालकहरूले एकतर्फी रूपमै फिल्म हल खोलेका थिए । उनीहरूले सिनेमा हल खोले पनि सञ्चार मन्त्रालयले चलचित्र प्रदर्शनका लागि बक्स अफिसको कोडसमेत दिएको थिएन । नयाँ चलचित्रलाई सञ्चार मन्त्रालले सेन्सर गर्ने अनुमतिसमेत चलचित्र विकास बोर्डलाई दिएको थिएन । सोही कारण एकतर्फी रूपमा चलचित्र घर खोलेका सिनेकर्मीहरूले नयाँ फिल्म प्रदर्शन गर्न पाएका थिएनन् ।

चलचित्र विकास बोर्डका अध्यक्ष दयाराम दाहालले मन्त्रिपरिषद्को निर्णयबाट सिनेमा हल खोलिएकोमा अब आफूहरूले फिल्म चलाउने बक्स अफिसको कोर्ड दिने बताएका छन् । यसअघि सरकारले हल खोल्ने अनुमति नदिएकै कारण आफूहरूले बक्स अफिसको कोर्ड फिल्म चलाउनका लागि दिन नसकेको पनि उनले स्पष्ट पारे । सरकारले चलचित्र प्रदर्शन गर्न रोक लगाए पनि आफूहरू गत महिनाबाट चलचित्रको सेन्सर कार्य भने सुरु गरेको पनि अध्यक्ष दाहालले बताए ।

मन्त्रिपरिषद्ले चलचित्र घर खोल्ने अनुमति दिएपछि आफूहरूलाई अब चलचित्र चलाउन सहज भएको हल सञ्चालकहरूको संस्था नेपाल चलचित्र संघका अध्यक्ष मधुसूदन प्रधानले बताएका छन् । ढिलै भए पनि सरकार सिनेमा हल खोलेको सो कार्यको संघले स्वागत गरेको प्रधानले बताएका छन् । सरकारले तोकेको मापदण्ड अपनाएर आफूहरूले सिनेमा हल खोलेको प्रधानले बताएका छन् ।

नेपाल चलचित्र निर्माता संघका अध्यक्ष आकाश अधिकारीको भनाइमा संघको निकै लामो कसरतपछि बल्ल सरकारले हल खोल्ने अनुमति दिएको हो । सरकारले कोरोना महामारीका कारण गत वर्षको चैत्र ११ गतेबाट देशभरका सिनेमा भवनहरू बन्द गर्ने निर्णय गरेको थियो । तर, लकडाउन सकिएको घोषणा गरिसक्दा पनि सरकारले सिनेमा भवनहरू भने संचालनका लागि अनुमति नदिएको उनले बताए । यही १ माघबाट नयाँ चलचित्र प्रदर्शनीसमेत सुरु भएकाले अब नयाँ नयाँ चलचित्रलाई निर्माताहरूले क्रममा रिलिज गर्ने पनि अधिकारीले बताएका छन् ।

यता सिनेमा हल खुले पनि हालसम्म नयाँ चलचित्र रिलिज गरिएको छैन । नयाँ चलचित्र प्रदर्शन गर्न निर्मातालाई प्रोत्साहन गर्नका लागि चलचित्र विकास बोर्डले केही सहुलियतको योजना पनि अघि सारेको छ । बोर्डका अध्यक्ष दयाराम दाहालका अनुसार नेपाली चलचित्र प्रदर्शन गरेबापत सिनेमा हलमा लाग्ने सरभर चार्ज अबको ६ महिनासम्मका लागि चलचित्र विकास बोर्डले तिरिदिने भएको छ ।

यस्तै अबको ६ महिनासम्म रिलिज हुने नेपाली फिल्मको पोस्टर पनि बोर्डले नै छापिदिने भएको छ । विभिन्न सञ्चार माध्यमसँग अनुरोध गरेर बोर्डले अब रिलिज हुने चलचित्रको प्रचारप्रसारका लागि गरिने विज्ञापनको आधा रकम छुट दिलाएको पनि अध्यक्ष दाहालले बताएका छन् ।

तपाइको प्रतिक्रिया
(Visited 190 times, 1 visits today)

Ads Space Available

epaper

भर्खरै

कांग्रेसमा मन्त्री छान्न सकस, कोइराला पक्ष छलफलमा

कुरी-कुरी

राजधानी राष्ट्रिय दैनिक:कुरी-कुरी – असोज ८, २०८०
राजधानी राष्ट्रिय दैनिक:कुरी-कुरी – असोज ८, २०८०
मकवानपुरमा एक 'नो भोट'