सप्तरी, राजविराज । किर्ते मुद्दाका फरार एक प्रतिवादी पक्राउ परेका छन् । सप्तरीको राजगढ गाउँपालिका २ घर भई हाल राजविराज नगरपालिका ५ बसोवास गर्दै आएका किर्ते मुद्दाका फरार प्रतिवादी अवधेश झा पक्राउ परेका हुन् ।
अघिल्लो दिन पक्राउ परेका उनलाई सप्तरी जिल्ला अदालतको आदेशले शुक्रबार राजविराज कारागार चलान गरिएको जिल्ला प्रहरी कार्यालय सप्तरीका सूचना अधिकारी एवं प्रहरी नायब उपरिक्षक माधव प्रसाद काफ्लेले जानकारी दिए ।
२०७७ साउन २ गते शोभानन्द ठाकुरको मृत्यु भएपश्चात् निजको जग्गा हडप्ने उद्देश्यले राजगढ गाउँपालिका वडा २ को छाप, लेटरप्याड तथा वडा अध्यक्ष समेतको हस्ताक्षर किर्ते गरि मालपोत कार्यालय सप्तरीमा पेश गरि किर्ते गरेको लिखित सम्बन्धी कसुर मुद्दामा अनुसन्धानका क्रममा फरार भएका उनलाई पक्राउ गरि अदालतमा उपस्थित गराइएको थियो ।
अदालतले ८ लाख ३६ हजार ५ सय रुँपैया धरौटी माँग गरेको र बुझाउन नसक्दा कारागार चलान गरिएको जिल्ला प्रहरी कार्यालय सप्तरीले जनाएको छ ।
