बुटवल । तत्कालीन नेपाल कम्युनिष्ट पार्टी (नेकपा)बाट निर्वाचित प्रदेशसभा सदस्य विमला वलीले माओवादी केन्द्र रोजेपछि प्रदेशसभामा नेकपा एमालेको बहुमत नपुग्ने भएको छ । योसँगै लुम्बिनी प्रदेशमा एमालेको एकल सरकार गठन गर्ने मुख्यमन्त्री शंकर पोखरेलको प्रयाससमेत असफल हुने देखिएको छ ।
दाङ ३ (ख) बाट नेकपाबाट निर्वाचित वलीले अन्तिम समयमा माओवादी केन्द्र रोजेपछि लुम्बिनीको राजनीति नै तरंगित बन्न पुगेको छ । वलीले माओवादी केन्द्र रोजेको औपचारिक जानकारी प्रदेश सभालाई समेत जानकारी गराइसकिएको छ ।
प्रदेशसभा सदस्य उत्तरकुमार वलीको निधनपछि तत्कालीन नेकपाले उनकी पत्नी विमलालाई उम्मेदवार बनाएको थियो । उत्तरकुमार भने एमालेबाट निर्वाचित भएका थिए ।
वलीले माओवादी रोजेपछि ८१ सदस्यीय लुम्बिनी प्रदेश सभामा सत्तारूढ एमालेसँग ४० सांसद मात्र छन् । यससँगै एकल बहुमतको सरकार बनाउने एमालेको प्रयासमा धक्का लागेको हो ।
मुख्यमन्त्री शंकर पोखरेलले आइतबार विहान राजीनामा दिएका थिए ।
