सुन्दरहरैँचा (मोरङ) । गछिया युवा समाज, सुन्दरहरैँचा–३ मोरङले आफ्नो पहिलो वार्षिकोत्सवको अवसरमा विद्यालय भेला तथा शैक्षिक सामग्री वितरण कार्यक्रम आयोजना गरेको छ। सुन्दरहरैँचा–५ स्थित श्रीलाल आधारभूत विद्यालय, लाटीझोडामा आयोजित कार्यक्रममा विद्यालयका ६० जना विद्यार्थीलाई ब्याग, कापी, पेन्सिललगायतका शैक्षिक सामग्री वितरण गरिएको हो।

“शिक्षा, स्वास्थ्य, खेलकुद र सामाजिक सेवा : हाम्रो प्रतिबद्धता, हाम्रो पहिचान” भन्ने मूल नाराका साथ आयोजित कार्यक्रममा विद्यार्थीलाई आवश्यक शैक्षिक सामग्री प्रदान गर्दै अध्ययनप्रति थप उत्साहित बनाउने उद्देश्य राखिएको आयोजकले जनाएको छ।

गछिया युवा समाजका अध्यक्ष सरोज दाहालको अध्यक्षतामा सम्पन्न कार्यक्रममा सुन्दरहरैँचा–५ का वडा अध्यक्ष गणेश चौधरी प्रमुख अतिथिका रूपमा सहभागी थिए। कार्यक्रममा सुन्दरहरैँचा उद्योग वाणिज्य संघका अध्यक्ष रमेश थापा, श्री श्रीलाल आधारभूत विद्यालयका प्रधानाध्यापक दलमर्दन तिवारीलगायतको उपस्थिति थियो।

कार्यक्रममा विद्यार्थीलाई विद्यालय झोला, कापी, पेन्सिललगायतका सामग्री हस्तान्तरण गरिएको थियो। शैक्षिक सामग्री पाएपछि विद्यार्थीहरू उत्साहित देखिएका थिए। आर्थिक अवस्था तथा अन्य कारणले आवश्यक सामग्रीको अभाव झेलिरहेका विद्यार्थीका लागि यस्तो सहयोगले अध्ययनमा थप हौसला मिल्ने अपेक्षा गरिएको छ।

प्रमुख अतिथि वडा अध्यक्ष गणेश चौधरीले बालबालिकाको शिक्षामा गरिने सहयोग समाज विकासको महत्वपूर्ण आधार भएको बताए। विद्यार्थीलाई आवश्यक शैक्षिक सामग्री उपलब्ध गराएर अध्ययनमा प्रोत्साहन गर्नु सकारात्मक सामाजिक कार्य भएको उल्लेख गर्दै उनले स्थानीय संघसंस्था तथा युवाहरूले शिक्षा क्षेत्रमा गर्दै आएको योगदानको प्रशंसा गरे।

गछिया युवा समाजका अध्यक्ष सरोज दाहालले संस्थाको पहिलो वार्षिकोत्सवलाई सामाजिक सेवासँग जोड्ने उद्देश्यले कार्यक्रम आयोजना गरिएको बताए। युवाहरूको सक्रियता समाज परिवर्तन र सेवामुखी कार्यमा केन्द्रित हुनुपर्नेमा जोड दिँदै उनले आगामी दिनमा शिक्षा, स्वास्थ्य, खेलकुद तथा सामाजिक सेवाका क्षेत्रमा थप कार्यक्रम सञ्चालन गर्ने प्रतिबद्धता व्यक्त गरे।

त्यस्तै, उद्योग वाणिज्य संघका अध्यक्ष रमेश थापाले विद्यार्थीलाई गरिएको सहयोगले उनीहरूको शैक्षिक यात्रामा सकारात्मक प्रभाव पार्ने बताए। शिक्षामा गरिने लगानीले तत्कालीन आवश्यकता पूरा गर्नुका साथै सक्षम पुस्ता निर्माणमा समेत योगदान पुर्‍याउने उनको भनाइ थियो।

विद्यालयका प्रधानाध्यापक दलमर्दन तिवारीले विद्यार्थीलाई शैक्षिक सामग्री सहयोग गरेकोमा गछिया युवा समाजप्रति आभार व्यक्त गरे। विद्यालय र समुदायबीचको सहकार्यले बालबालिकाको शैक्षिक विकासमा महत्वपूर्ण भूमिका खेल्ने भन्दै उनले यस्तो सहयोगले विद्यार्थीमा पढाइप्रति थप उत्साह बढ्ने बताए।

गछिया युवा समाजले पहिलो वार्षिकोत्सवकै अवसरमा आयोजना गरेको उक्त कार्यक्रमले संस्थाको सामाजिक सेवाप्रतिको प्रतिबद्धता झल्काएको सहभागीहरूले बताएका छन्।

शिक्षा, स्वास्थ्य, खेलकुद र सामाजिक सेवालाई प्राथमिकतामा राख्दै आगामी दिनमा पनि समुदायका आवश्यकता पहिचान गरी विभिन्न सामाजिक कार्यक्रमलाई निरन्तरता दिने संस्थाले जनाएको छ। कार्यक्रममा विद्यार्थी, शिक्षक, अभिभावक तथा स्थानीयको सहभागिता रहेको थियो।

सम्बन्धित समाचार

पौडी खेल्ने क्रममा ३ दाजुभाइको डुबेर मृत्यु झापामा ३७८ जनाले पाए आमाको नामबाट नागरिकता नहरमा डुबेर १० वर्षीय बालकको मृत्यु २५ दिन यता मेची राजमार्ग अवरुद्ध ब्रोड पिक हिमाल आरोहणमा गएका पुर्जासहित सबै १० जना आरोहीको निधन पहिरो प्रभावमा कालिका मावि, अस्थायी टहरामा पठनपाठन सरकारको सिस्टम बिग्रिँदा सेवाग्राहीलाई दोब्बर जरिवाना ग्रामथानमा लागुऔषधविरुद्ध महाअभियान