जनकपुरधाम । स्थानीय तह निर्वाचनको टिकटका लागि जनता समाजवादी पार्टी नेपालभित्र विवाद हुँदा कुटपिट भएको छ । जनता समाजवादी पार्टी नेपालले धनुषाको गणेशमान चारनाथ नगरपालिकाको नगरप्रमुखको उम्मेदवार छनोट गरेपछि पार्टीका केन्द्रिय कार्यकारिणी सदस्य गजाधर रोहिता यादवसहित करिव १० जना नेता÷कार्यकर्ता कुटिएका हुन् ।
जनकपुरधाममा धनुषाको हंसपुर नगरपालिका, गणेशमान चारनाथ नगरपालिका र शहिदनगर नगरपालिकाको उम्मेदवारलाई टिकट वितरण गर्न बैठक बसिरहेका बेला टिकट वितरणमा विवाद हुँदा यादवसहित १० जनामाथि हातपात गरिएको हो ।
गणेशमान चारनाथ नगरपालिकाको लागि पार्टीका मधेस प्रदेश अध्यक्ष शेषनारायण यादव र गजाधार रोहिता यादवले अर्का उम्मेदवार छनोट गरेपछि निवर्तमान मेयर रामबाबु यादव असन्तुष्ट बनेको स्रोतको भनाइ छ ।
रामबाबुले आफूले पुनः टिकट पाउनुपर्ने अडान राखेपछि बैठक हलमा असन्तुष्टिका स्वरहरू सुनिन थालेपछि अर्को उम्मेदवार चयन गर्ने निर्णय भएपछि रामबाबुका समर्थकहरूले रोहितालगायत अन्य नेता कार्यकर्तामाथि हातपात गरेका छन् । कुटपिटबाट रोहितालाई गम्भीर चोटपटक लागेको छ भने अन्य व्यक्तिहरू सामान्य घाइते भएका छन् ।
यता, भौतिक पूर्वाधार तथा यातायतमन्त्रीसमेत रहेकी पार्टीकी नेतृ रेणुकुमारी यादव, शेषनारायण यादव र गजाधर रोहितालगायतका नेताहरूले आफू अनुकूल मनपरी रूपले टिकट वितरण गरेपछि बाध्य भएर विरोध गरेको रामबाबु यादवको भनाइ छ ।