पोखरा । पोखरा महानगरपालिकाको मेयरमा नेकपा (एकीकृत समाजवादी) ले अग्रता कायमै गरेको छ । मतगणना सुरु भएको एक साता बित्दा पोखराको ६० प्रतिशत मतगणना सम्पन्न भएको हो ।
मुख्य निर्वाचन अधिकृतको कार्यालयका अनुसार कुल १ लाख ४३ हजार २ सय २६ मतदानमध्ये शनिबार दिउँसोसम्म ८६ हजार २ सय ५७ मतगणनामा गठबन्धनअन्तर्गत समाजावादीका धनराज आचार्यले अग्रता कायमै राखेका हुन् ।
उनले ३४ हजार ८ सय १९ मत प्राप्त गर्दा नेकपा एमालेका कृष्ण थापाले ३१ हजार ३ सय ७४ मत प्राप्त गरेका छन् । आचार्य ३ हजार ४ सय ४५ मतान्तरले अघि छन् । नेकपा एमालेको पकड क्षेत्र भनिएका वडामा समेत थापाको पक्षमा अपेक्षाकृत मत आउन नसकेपछि आचार्यलाई जीतको सम्भावना बलियो बन्दै गएको पाइन्छ । पोखराका कुल ३३ वडामध्ये हालसम्म १९ वटा वडाको मतगणना सम्पन्न भएको छ । राप्रपाबाट मेयरका उम्मेदवार शंकर खरालले ३ हजार ८ सय ८१ र स्वतन्त्रका उम्मेदवार गनेस पौडेलले २ हजार ३ सय ५० प्राप्त गरेका छन् ।
उपमेयरमा सत्ता गठबन्धनअन्तर्गत नेकपा एमालेले फेरि अग्रता लिएको । उपमेयर उम्मेदवार मञ्जुदेवी गुरुङले ३५ हजार ७ सय ९९ मत प्राप्त गर्दा सत्ता गठबन्धनबाट नेपाली कांग्रेसकी उम्मेदवार कोपिला रानाभाटले ३५ हजार २ सय ८९ मत प्राप्त गरेकी छन् । केही दिनसम्म रानाभाटको अग्रता रहेकोमा पछिल्लो समय गुरुङ अघि बढेकी हुन् । दुवैबीच कडा प्रतिस्पर्धा छ । उपमेयरमा एमाले ५ सय बढी मतान्तरले अघि छन् ।