अर्घाखाँची । जिल्ला प्रशासन कार्यालय अर्घाखाँचीले नागरिकता वितरणको क्रममा पुरुषलाई महिला बनाएर वितरण गरेको पाइएको छ । मालारानी गाउँपालिका–८ का कमलप्रसाद अधिकारीको नागरिकतामा यस्तो बनाएको पाइएको हो ।
गत आर्थिक वर्षको २१ चैतमा जिल्ला प्रशासन कार्यालयबाट नागरिकता प्राप्त गरेकामा बिहीबार मात्र कामले थाहा पाएको अधिकारीले बताए ।
कमलप्रसाद अधिकारीकी श्रीमती उषा आचार्य (अधिकारी) मंगलबार विशेष कामले सन्धिखर्क आएको समयमा श्रीमतीले नागरिकता पठाउन भनेको र सोही क्रममा यस्तो भेटिएको उनको भनाइ छ ।
‘खेतबारीमा काम गर्ने किसानका छोरा हुँ, नागरिकता प्रशासनले जस्तो दियो त्यस्तै लगेर घर गएको थिएँ, यस्तो होला भनेर कल्पनासमेत गरेको थिइनँ,’ उनले भने ।
नागरिकतामा प्रशासकीय अधिकृत सरोज भुसालको हस्ताक्षर रहेको छ । सशस्त्र द्वन्द्वको समयमा २०५९ सालमा सदरमुकाम सन्धिखर्क आक्रमण हुँदा जलेर नागरिकता नष्ट भएपछि पुराना नागरिकतालाई मान्यता नदिँदा यहाँ नयाँ बनाउने क्रम अहिलेसम्म जारी छ ।
