गुल्मी । रेसुङ्गगाको प्रतीक तम्घास बजारमै बनाइएको छ । जिल्ला सदरमुकाम तम्घासस्थित लाकुरीमञ्चमा धार्मिक, ऐतिहासिक र पर्यटकीय स्थल रेसुंगाको प्रतीक बनाइएको हो । प्रतीकहरूमा तम्घासबाट देखिने रेसुङ्गा क्षेत्र, रेसुंगा यज्ञशाला, शृङ्गे ऋषि, रामले वाण हानेर पानी निकालेको, हनुमान, मृग र चितुवा लगायतका भित्तेचित्र प्रतीकका रूपमा बनिसेका छन् । त्यसैगरी चिदिचौर खेलमैदानको भित्तामा विभिन्न खेलकुदका चित्तहरु पनि निर्माण गरिएको छ ।
अहिले रेसुंगा क्षेत्रमा मान्यता रहिआएको गरुडले राक्षससँग लडेर समुन्द्र मन्थन गरी त्यस क्षेत्रमा ल्याएर अमृत खसालेको दृश्य निर्माण भएको बिके आर्ट ग्यालरीका सञ्चालक नरबहादुर विकले जानकारी दिए ।
रेसुङ्गा नगरपालिकाले भित्तेचित्र निर्माणका लागि प्रति स्क्वायर फिट ३ सय ७५ रुपैयाँमा बिके आर्ट ग्यालरीलाई जिम्मा दिइएको छ । समग्रमा नगरपालिकाले १ हजार ६ सय स्क्वायर फिट क्षेत्रमा भित्तेचित्रको काम गर्न लागेको नगरपालिकाका इन्जिनियर कृष्ण कोइरालाले जानकारी दिए ।
हाल जिल्ला प्रशासन कार्यालय अगाडि भित्तेचित्र निर्माण भइरहेका छन् । अब लगत्तै नेपाल टेलिकम अगाडि र रेसुंगा नगरपालिका अगाडि भित्तेचित्र निर्माणका काम हुने रेसुंगा नगरपालिका प्रमुख खिलध्वज पन्थीले बताए । ‘पर्यटन प्रवद्र्धनका लागि हामीले यो सोच बनाएका हौँ,’ उनले भने, ‘जाऊँ हिँड रेसुंगा अभियानलाई साथ दिन तम्घास बजारमै रेसुंगाको प्रतीक बनाएका छौँ ।’ रेसुङ्गा नगरपालिकाले रेसुंगामा पर्यटक भित्र्याउनका लागि गत वर्षदेखि ‘जाऊँ हिँड रेसुंगा’ अभियान सञ्चालन गरेको छ ।
