सुन्दरहरैंचा (मोरङ) । स्थानीय स्काउट कमिटीको आयोजना तथा हिमालय इङ्लिस स्कुलको सह–आयोजनामा ‘हिमालय मनसुन स्काउट क्याम्प–२०८३’ सञ्चालन गरिने भएको छ। क्याम्प’bout जानकारी दिन बिहीबार आयोजित पत्रकार सम्मेलनमा आयोजकले क्याम्प साउन १ गतेदेखि ३ गतेसम्म हिमालय इङ्लिस स्कुल, सुन्दरहरैंचा–१०, विराटचोकमा सञ्चालन हुने जानकारी दिएको हो।

तीनदिने क्याम्पमा स्काउटका आधारभूत सिद्धान्त, नेतृत्व विकास, अनुशासन, टोलीगत कार्य, प्राथमिक उपचार, विपद् व्यवस्थापन, वातावरण संरक्षण, सामुदायिक सेवा तथा व्यवहारिक शिक्षासम्बन्धी विविध गतिविधि सञ्चालन गरिने जनाइएको छ। आयोजकका अनुसार क्याम्पले विद्यार्थीमा आत्मविश्वास, जिम्मेवारीबोध, सहकार्यको भावना र नेतृत्व क्षमता विकास गर्न महत्वपूर्ण योगदान पुर्‍याउने अपेक्षा गरिएको छ।

पत्रकार सम्मेलनमा बोल्दै सुन्दरहरैंचाका स्थानीय स्काउट प्रमुख आयुक्त मनिज लामा कार्कीले स्काउट अभियानले विद्यार्थीको व्यक्तित्व विकासमा महत्वपूर्ण भूमिका खेल्ने बताए । उनले स्काउटले अनुशासन, इमान्दारिता, सेवा भावना र सामाजिक उत्तरदायित्वको विकास गराउँदै असल नागरिक निर्माणमा योगदान पुर्‍याउने उल्लेख गरे ।

उनका अनुसार मनसुन क्याम्पले विद्यार्थीलाई विपद्का समयमा आवश्यक पर्ने आधारभूत सीप सिकाउनुका साथै सामूहिक रूपमा काम गर्ने संस्कृतिको विकास गर्न मद्दत गर्नेछ। यस्ता कार्यक्रमलाई स्थानीय तह, विद्यालय र अभिभावक सबैको साथ र सहयोग आवश्यक रहेको उहाँले बताए । त्यसैगरी हिमालय स्काउट ट्रुपका प्रमुख सुजन थापाले क्याम्पलाई सिकाइ र व्यवहारिक अभ्यासलाई जोड्ने गरी तयार गरिएको जानकारी दिए ।

उनका अनुसार क्याम्पमा टोलीगत खेल, स्काउट ड्रिल, गाँठो बाँध्ने सीप, प्राथमिक उपचार, क्याम्प क्राफ्ट, वातावरण संरक्षण, नेतृत्व विकास, सामुदायिक सेवा तथा विभिन्न सिर्जनात्मक गतिविधि समावेश गरिनेछ। उनले सहभागी विद्यार्थीले पुस्तकमा सीमित ज्ञानभन्दा बाहिर व्यवहारिक अनुभव हासिल गर्ने, आत्मनिर्भर बन्ने र समूहमा सहकार्य गर्दै नेतृत्व गर्न सिक्ने अवसर प्राप्त गर्ने विश्वास व्यक्त गरे ।

हिमालय इङ्लिस स्कुलका संस्थापक प्रिन्सिपल कमल खनालले विद्यालयले शैक्षिक गुणस्तरसँगै विद्यार्थीको सर्वाङ्गीण विकासलाई प्राथमिकतामा राख्दै आएको बताए । उनले स्काउटजस्ता अतिरिक्त क्रियाकलापले विद्यार्थीलाई जिम्मेवार, अनुशासित र समाजप्रति उत्तरदायी नागरिक बन्न प्रेरित गर्ने भएकाले क्याम्पमा सहभागी हुन विद्यार्थी तथा अभिभावकलाई आग्रह गरे ।

विद्यालयले यस्ता कार्यक्रमलाई निरन्तरता दिँदै विद्यार्थीको क्षमता अभिवृद्धिमा विशेष ध्यान दिँदै आएको उनले उल्लेख गरे ।आयोजकका अनुसार क्याम्पमा ५० भन्दा बढी विद्यार्थीको सहभागिता रहने अपेक्षा गरिएको छ। विभिन्न उमेर समूहका स्काउट विद्यार्थी सहभागी हुने उक्त क्याम्पमा अनुभवी प्रशिक्षकमार्फत प्रशिक्षण प्रदान गरिनेछ। क्याम्प अवधिभर सुरक्षा, अनुशासन र व्यवहारिक सिकाइलाई विशेष प्राथमिकता दिइने आयोजकको भनाइ छ।

कार्यक्रमको आयोजना स्थानीय स्काउट कमिटीले गरेको हो भने व्यवस्थापन तथा सह–आयोजनाको जिम्मेवारी हिमालय इङ्लिस स्कुलले सम्हालेको छ। आयोजकले मनसुन क्याम्पलाई स्काउट गतिविधिको प्रवर्द्धन, विद्यार्थीको नेतृत्व विकास तथा समाजमा सकारात्मक सन्देश प्रवाह गर्ने प्रभावकारी माध्यमका रूपमा लिएको जनाएको छ।

तीनदिने क्याम्प सफलतापूर्वक सम्पन्न हुने विश्वास व्यक्त गर्दै आयोजकले विद्यार्थी, अभिभावक तथा सरोकारवाला सबैलाई सहयोग र सहभागिताका लागि अनुरोध गरेको छ।

सम्बन्धित समाचार

उत्कृष्ट काम गर्ने दुई उपभोक्ता समिति र कर्मचारी सम्मानित देशभर भारी वर्षाको चेतावनीः धानदेखि तरकारीसम्म जोखिममा पर्सामा झगडिया बढे नेतृत्वसँगै समृद्धिको बाटो : षडानन्दका मेयर उदासको लोभलाग्दो कृषि कर्म बझाङमा जिप दुर्घटना हुँदा ३ जनाको मृत्यु, ५ जना गम्भीर घाइते मेची राजमार्गको राजदुवाली खण्ड भासियो, यातायात अवरुद्ध मौसम बदलीसँगै देशभर विपद्को जोखिम सूचना लुकाउँछ इटहरी उपमहानगरपालिका