काठमाडौं । भारत भ्रमणमा रहेका राष्ट्रिय स्वतन्त्र पार्टी (रास्वपा)का सभापति रवि लामिछानेले राजनीतिक एजेन्डामा नभई नेपालको आर्थिक समृद्धि र विकासको ढोका खोल्ने विशेष एजेन्डासहित आफू नयाँदिल्ली आएको बताएका छन् ।
प्रवासी नेपाली सम्पर्क मञ्च भारतद्वारा बिहीबार नयाँदिल्लीमा आयोजित विशेष समारोहलाई सम्बोधन गर्दै सभापति लामिछानेले नेपालको उन्नति नै आफ्नोे भ्रमणको एकमात्र उद्देश्य भएको बताए ।
‘हामी सम्मानित मात्र भएर पुग्दैन, समृद्ध पनि हुनुपर्नेछ । नयाँ दिल्लीमा राजनीतिक ढोका खोल्न त धेरै आए, तर यसपटक म समृद्धिको ढोका खोल्न आएको हुँ । समृद्ध नेपालको सपनामा सहकार्य गर्ने एजेन्डा बोकेर म यहाँ आएको छु,’ उनले भनेका छन् ।
उनले भारतसँगमा व्यक्तिगत वा पार्टीगत माग केही नरहेको उल्लेख गर्दै सबै मुद्दा नेपाल र नेपालीको उन्नतिमा मात्र केन्द्रित रहेको बताए ।
सभापति लामिछानेले पार्टी संठनलाई मजबुत बनाउन निर्देशन दिएका छन् । दिल्लीमा आयोजित कार्यक्रममा बोल्दै उनले आफूहरूले केही खराब काम गरे खबरदारी गर्न आग्रह गरे ।
‘हामीले केही खराब ग¥यौं भने सल्लाह, सुझाव दिनुहोला । जुन आँट र भरोसाका साथ तपाईंहरूले घरमा भनेर घण्टीमा भोट हाल्नुस् भन्नुभएको थियो, हामी तपाईंको शिर निहुरिने कुनै पनि काम गर्दै छैनौँ, म वाचा गर्छु,’ उनले भने ।
परराष्ट्रमन्त्री खनाल भारत जाँदै
परराष्ट्रमन्त्री शिशिर खनाल भारतका विदेशमन्त्री डा. एस जयशंकरको मैत्रीपूर्ण निमन्त्रणामा शुक्रबारदेखि तीनदिने भारतको औपचारिक भ्रमणमा जाने तय भएको छ ।
भ्रमणका क्रममा परराष्ट्रमन्त्री खनालले समकक्षी मन्त्री डा. जयशकरसँग औपचारिक भेटवार्ता गर्नेे परराष्ट्र मन्त्रालयले जनाएको छ । भेटमा उनीहरूबीच द्विपक्षीय व्यापार, लगानी, सम्पर्क सञ्जाल (कनेक्टिभिटी), ऊर्जा तथा जनस्तरका सम्बन्धलगायत विषयमा छलफल हुनेछ ।
उच्चस्तरीय भ्रमणको नियमित आदानप्रदानको एक हिस्साका रूपमा यस भ्रमणले नेपाल र भारतबीच रहीआएको बहुआयामिक सम्बन्धलाई अझ सुदृढ तुल्याउने सहयोग गर्ने विश्वास लिइएको छ । परराष्ट्रमन्त्री खनाल २४ जेठमा काठमाडौं फर्कने कार्यक्रम रहेको मन्त्रालयले जनाएको छ ।
सम्बन्धित समाचार
रास्वपाको प्रथम महाधिवेशन तयारी कार्यतालिका सार्वजनिक
दुर्गा प्रसाईंविरुद्ध मुद्दा दर्ता
नागरिकको दैनिक जीवनस्तर उकास्न सरकार प्रतिबद्ध छः प्रधानमन्त्री
सगरमाथा दिवसको अवसरमा प्रभातफेरि
राष्ट्रियसभा बैठक २० मिनेटको लागि स्थगित
रास्वपाको केन्द्रीय समिति विघटन
सिंहदरबारमा प्रतिपक्षी दलको बैठक बस्दै
प्रतिनिधि सभाको बैठक सुरु हुने वितिक्कै विपक्षी दलको विरोध
