धनगढी । सुदूरपश्चिम प्रदेशसभामा कुनै पनि दलको स्पष्ट बहुमत नहुँदा सरकार गठन र पुनर्गठनको क्रम निरन्तर चलिरहेको छ । प्रदेश सरकारको दोस्रो कार्यकालको साढे तीन वर्षको अवधिमा चार जना मुख्यमन्त्री फेरिएका छन् भने ३३ जना सांसद मन्त्री वा राज्यमन्त्री बनिसकेका छन् ।
५३ सदस्यीय प्रदेशसभामा हाल ५१ सदस्यीय रहेको छ । डडेलधुराबाट निर्वाचित स्वतन्त्र सांसद डा. ताराप्रसाद जोशी प्रतिनिधिसभा सदस्यमा निर्वाचित भएपछि प्रदेशसभा सदस्य पदबाट राजीनामा दिएका थिए । यस्तै, तत्कालीन नेकपा (एकीकृत समाजवादी) हाल नेपाली कम्युनिस्ट पार्टीका नेता तथा पूर्वमुख्यमन्त्री दीर्घ सोडारी निलम्बनमा छन् ।
प्रदेशमा हाल नेपाली कांग्रेस र नेकपा एमालेको संयुक्त सरकार छ । सरकारको नेतृत्व नेपाली कांग्रेसका कमलबहादुर शाहले गरिरहेका छन् । प्रदेशसभामा प्रतिनिधित्व गर्ने राप्रपाबाहेक सबै दल सरकारमा सहभागी भइसकेका छन् ।
कांग्रेस–एमाले गठबन्धनसँग प्रदेशसभामा २९ सांसद छन् । तीमध्ये १७ जनाले मन्त्री वा राज्यमन्त्री बन्ने अवसर पाइसकेका छन् । विशेषगरी तत्कालीन नेकपा (एकीकृत समाजवादी) हाल नेपाली कम्युनिस्ट पार्टीका नेता दीर्घ सोडारी नेतृत्वको सरकारका बेला एमाले र सहयोगी दलका धेरै सांसद मन्त्री बनेका थिए ।
सोडारीको पालामा मन्त्री बन्नेहरूमा खगराज भट्ट, अक्कलबहादुर रावल, ओमविक्रम भाट, कैलाश चौधरी, खुशीराम डगौरा, घनश्याम चौधरी, रमेशसिंह धामी, रामेश्वर चौधरी र लक्ष्मणकिशोर चौधरी रहेका छन् । त्यसैगरी लक्ष्मी विक, माया पन्त, नरेशकुमार शाही, झपटबहादुर साउँद र टीका थापा मन्त्री बनेका थिए भने इन्दिरा गिरी र गीतादेवी मालले राज्यमन्त्रीको जिम्मेवारी सम्हालेका थिए ।
हाल सभामुख रहेका भीमबहादुर भण्डारी तथा सांसद प्रकाश रावल, शिवसिंह ओली, जानकीदेवी कुँवर र मानबहादुर धामीले भने अहिलेसम्म मन्त्री बन्ने अवसर पाएका छैनन् ।
प्रदेशसभामा नेपाली कांग्रेसका १८ सांसद छन् । तीमध्ये मुख्यमन्त्री कमलबहादुर शाहसहित १३ जना मन्त्री वा राज्यमन्त्री बनिसकेका छन् । कांग्रेसबाट मन्त्री बन्नेहरूमा बहादुरसिंह थापा, प्रकाशबहादुर देउवा, मेघराज खड्का, शिवराज भट्ट, विक्रमसिंह धामी, मानबहादुर रावल र बेलबहादुर राना मगर रहेका छन् ।
त्यस्तै प्रकाशबहादुर बम, सरस्वती खड्का, मधुदेवी भारती र जुनाकुमारी दानीले राज्यमन्त्रीको जिम्मेवारी सम्हालेका छन् । मन्त्री रहँदै गर्दा सवारी दुर्घटनामा बझाङका पृथ्वीबहादुर सिंहको निधन भएको थियो ।
कांग्रेसबाट हालसम्म मन्त्री बन्न बाँकी सांसदहरूमा दिवानसिंह विष्ट, पदमबहादुर शाही, गीता चौधरी, ललिता सुनार, तुलसी देवकोटा र डम्मरी महरा रहेका छन् ।
एमालेका ११ प्रदेशसभा सदस्यमध्ये ६ जनाले मन्त्री वा राज्यमन्त्री बन्ने अवसर पाएका छन् । हाल सुरेन्द्रबहादुर पाल, हिरासिंह सार्की र वीरबहादुर थापा मन्त्री छन् भने निर्मलादेवी साउँद राज्यमन्त्री छन् । सन्तोषकुमारी शर्मा थापाले एक महिना बिनाविभागीय मन्त्रीका रूपमा काम गरेकी थिइन् ।
एमालेबाट उपसभामुख रहेकी कोइलीदेवी चौधरीसहित धर्मराज पाठक, चक्रबहादुर मल्ल, दमनबहादुर भण्डारी र जानकी ऐर बम भने अहिलेसम्म मन्त्री बन्न सकेका छैनन् ।
सुदूरपश्चिम प्रदेश सरकारको साढे तीन वर्षे अवधिमा सरकार फेरबदल र मन्त्री नियुक्तिको उच्च दरले प्रदेशको राजनीतिक अस्थिरता र सत्ता साझेदारीको प्रवृत्तिलाई स्पष्ट रूपमा देखाएको छ ।
सम्बन्धित समाचार
९ बुँदे टीकापुर सन्देशपत्र जारी, संघीयता कार्यान्वयन र संसद सुदृढीकरणमा जोड
प्रतिनिधिसभा बैठक मंगलबारसम्मका लागि स्थगित
सुस्तामा तटबन्ध निर्माणमा भारतीय पक्षको अवरोध
विपक्षीको विरोधपछि प्रतिनिधिसभाको बैठक स्थगित
‘माफी’ मागले ५ दिन धकेल्यो प्रतिनिधिसभा
राष्ट्रसङ्घीय विकास प्रणालीलाई सुदृढ गर्नुपर्नेमा नेपालको जोड
कैलालीमा प्रेमीसहित ३ जनाबाट १८ वर्षीया युवती बलात्कृत, आरोपी पक्राउ
नतिजा देखिने गरी कार्यसम्पादन गर्न सञ्चारमन्त्री डा तिमिल्सिनाको निर्देशन
