पोखरा । पोखरा महानगरपालिकाले आगामी आर्थिक वर्ष २०८३÷८४ का लागि ७ अर्ब १५ करोड २५ लाख रुपैयाँको बजेट सार्वजनिक गरेको छ । महानगरको १९ औं नगर सभामा शुक्रबार महानगर उपप्रमुख मञ्जुदेवी गुरुङले आगामी आर्थिक वर्षको बजेट सार्वजनिक गरेकी हुन् । प्रस्तुत बजेट चालु आर्थिक वर्षको तुलनामा करिब १४ प्रतिशतले कमी हो ।

महानगरले विकास निर्माण (पुँजीगत) भन्दा प्रशासनिक र सेवा प्रवाह (चालु) तर्फ बढी रकम विनियोजन गरेको छ । कुल बजेटमध्ये ५५.१ प्रतिशत रकम चालु खर्च तथा ४४.९ प्रतिशत मात्रै पुँजीगत खर्चतर्फ विनियोजन गरिएको हो ।

बजेट स्रोत जुटाउन संघीय सरकारबाट ३ अर्ब १८ करोड ६० लाख रुपैयाँ वित्तीय हस्तान्तरणमार्फत प्राप्त हुने अपेक्षा महानगरको छ । सशर्त अनुदानतर्फ २ अर्ब ६१ करोड ९१ लाख, समानीकरणतर्फ ४९ करोड ३७ लाख, विशेष अनुदानतर्फ ५ करोड ५० लाख र समपूरक अनुदानतर्फ १ करोड ८२ लाख रुपैयाँ प्राप्त हुने अनुमान गरिएको छ ।

महानगरले गण्डकी प्रदेश सरकारबाट ९ करोड १५ लाख ३६ हजार रुपैयाँ प्राप्त गर्ने प्रक्षेपण गरेको छ । जसमा समानीकरण अनुदान ८ करोड १५ लाख ३६ हजार, समपूरक ६० लाख र विशेष अनुदान ४० लाख रुपैयाँ छ ।

महानगरले आन्तरिक आय र राजस्व बाँडफाँडतर्फ ३ अर्ब ८७ करोड ४९ लाख ६४ हजार रुपैयाँ संकलन गर्ने लक्ष्य लिएको छ । यसमध्ये महानगरको आफ्नै आन्तरिक स्रोतबाट २ अर्ब ४८ करोड ७३ लाख ९१ हजार रुपैयाँ जुटाइने जनाइएको छ । बाँकी रकममध्ये संघीय राजस्व बाँडफाँडबाट ३४ करोड ३४ लाख ७३ हजार, प्रदेशबाट ४ करोड ९ लाख ८६ हजार र स्थानीय राजस्वतर्फ १ अर्ब ३१ लाख १४ हजार रुपैयाँ प्राप्त हुने अनुमान छ ।

महानगरले बजेटमा आर्थिक गतिविधि विस्तार, रोजगारी सिर्जना र पूर्वाधार विकासलाई प्राथमिकतामा राखेको छ । पूर्वाधारतर्फ सडक, पुल, खानेपानी, शहरी विकास तथा पर्यटकीय संरचनाका लागि करिब १ अर्ब ६९ करोड ९ लाख विनियोजन गरिएको छ । समग्रमा पूर्वाधार तथा शहरी विकासका लागि २ अर्ब ८९ करोड ५५ लाख छुट्याइएको छ । फेवाताल संरक्षण, बसपार्क व्यवस्थापन, पोखरा सभागृह पुनर्निर्माण र विभिन्न रणनीतिक परियोजनालाई निरन्तरता दिइने भएको छ ।

बजेटले पोखरालाई पर्यटकीय राजधानी पोखरालाई थप सुदृढ बनाउने उद्देश्यसहित पर्यटन तथा खेलकुद प्रवद्र्धन कार्यक्रमलाई प्राथमिकता दिइएको छ । खेल पर्यटनका लागि मात्र ६६ लाख विनियोजन गरिएको छ । जसमा ड्रागन बोट रेस, क्रस कन्ट्री ट्रायथलन, प्याराग्लाइडिङ, साइकल टुर, हाइकिङ, फुटबल, क्रिकेट, टेनिस लगायतका प्रतियोगिता सञ्चालन गरिने भएको छ । पर्यटन पूर्वाधार, लेक–टु–लेक साइकल ट्र्याक, फेवा इको ट्रेल तथा साहसिक खेलकुदलाई जोड दिइएको छ । कृषि उत्पादन वृद्धि र बजारीकरणका लागि ३ करोड ६८ लाख विनियोजन गरिएको छ । सिँचाइ तथा भूमि व्यवस्थापनका लागि थप ५२ लाख छुट्याइएको छ । कृषि आधुनिकीकरण, उत्पादन वृद्धि र कृषकलाई बजारसँग जोड्ने कार्यक्रमलाई प्राथमिकता दिइएको छ । शिक्षा क्षेत्रमा १ अर्ब ८५ करोड ६३ लाख विनियोजन गरिएको छ। सामुदायिक विद्यालय नर्स कार्यक्रमका लागि ३ करोड र दिवा खाजा कार्यक्रमका लागि ४ करोड छुट्याइएको छ ।

स्वास्थ्यमा ४१ करोड ३६ लाख विनियोजन गरिएको छ । महानगरले “डिजिटल पोखरा” अवधारणालाई अघि बढाउँदै घरनक्सा पास, राजस्व भुक्तानी, सिफारिस तथा घटना दर्ता लगायतका सेवाहरूलाई पूर्ण रूपमा डिजिटल प्रणालीमा रूपान्तरण गर्ने जनाएको छ । सेवा प्रवाहलाई एकीकृत सूचना प्रणालीमा आबद्ध गर्दै प्रशासनिक दक्षता वृद्धि गर्ने लक्ष्य राखिएको छ ।

महानगरले आगामी बजेटमार्फत पर्यटन, पूर्वाधार, शिक्षा, स्वास्थ्य र डिजिटल शासनलाई मुख्य आधार बनाउँदै समुन्नत र अन्तर्राष्ट्रियस्तरको पर्यटकीय शहर निर्माण गर्ने लक्ष्य राखेको छ ।

महानगरले विकास निर्माणभन्दा प्रशासनिक र सेवाप्रवाह क्षेत्रमा बजेटको भार केही बढी देखिएको छ । गत वर्ष जेनजी आन्दोलनका कारण महानगरको कार्यालय भवन जलेर ध्वस्त भएपछि अहिले नयाँबजारस्थित वाणिज्य बैंकको भवन भाडामा लिएर कार्यालय संचालित छ । महानगरको नीति तथा कार्यक्रम बिहीबार मेयर धनराज आचार्यले सार्वजनिक गरेका थिए । प्रस्तुत बजेटमाथि नगरसभामा आवश्यक छलफलपछि पारित हुनेछ ।

सम्बन्धित समाचार

बीवाईडी भन्सार छली प्रकरण : सरकारले बनायो छानबिन समिति, नाकामै अनुसन्धान आधा शताव्दीदेखि सीमित व्यापारीको कब्जामा सयौं रोपनी सरकारी जग्गा दिगो विकास लक्ष्यमा नेपालको गति सुस्त, चुनौती बन्दै २०३० सम्मका लक्ष्य लमजुङको लेकाली भेकमा धान रोपाई सुरु बजेट विवादले आलोचनामा चर्चित अर्थमन्त्री अर्थतन्त्रमा उत्साहजनक सुधार तोलामा १० हजार १ सय रुपैयाँले घट्यो सुनको मूल्य आज सम्पत्ति छानबिन आयोगको सम्पत्ति विवरण बुझाउने समय एक महिना थप