धनगढी । कैलालीको धनगढीमा आगामी माघ ५ गतेदेखि प्रदेशस्तरीय सीप तथा रोजगार मेला सञ्चालन हुने भएको छ । धनगढी उपमहानगरपालिकाको आयोजनामा सो मेला हुन लागेको हो । वार्षिक क्यालेन्डरअनुसार मेला सञ्चालनका लागि उपमहानगरपालिकाले आवश्यक तयारी तीव्र पारेको जनाएको छ ।

उपमहानगरपालिकाले विगत तीन वर्षदेखि सीप तथा रोजगार मेला सञ्चालन गर्दै आएको छ । आगामी मेला पनि निर्धारित समयमै सञ्चालन गर्ने लक्ष्यसहित रोजगारदाता, तालिम प्रदायक संस्था, विभिन्न संघसंस्था तथा सरोकारवाला निकायसँग छलफल, समन्वय र सहकार्यलाई तीव्र बनाइएको उपमहानगरपालिकाले जनाएको छ ।

उपमहानगरपालिकाका अनुसार २०८१ र २०८२ सालमा पनि प्रदेशस्तरीय सीप तथा रोजगार मेला सञ्चालन गरिएको थियो । २०८१ सालको मेलामा १ हजार ४० जना शिक्षार्थी सहभागी भएका थिए भने २०८२ सालको मेलामा ६ सयभन्दा बढी युवायुवतीले सहभागिता जनाएका थिए ।

विगतका मेलाबाट प्राप्त अनुभवका आधारमा यसपटकको मेलालाई थप व्यवस्थित, प्रभावकारी र युवामैत्री बनाउने योजना रहेको उपमहानगरपालिकाले जनाएको छ ।

२०८२ सालमा आयोजित मेलामा सुदूरपश्चिम प्रदेशका ८४ स्थानीय तहको सहभागिता रहेको थियो । सात प्रमुख क्षेत्रअन्तर्गत २२ विधामा सीपमूलक तालिम सञ्चालन गरिएको उक्त मेलामा सहभागीलाई ३० दिनको सीप विकास तालिमसँगै १० दिन रोजगारीसँग जोडिने व्यावहारिक अभ्यास र उद्यमशीलता तालिम प्रदान गरिएको थियो ।

सीप तथा रोजगार मेलालाई तालिम दिने र लिने कार्यक्रममा मात्र सीमित नराखी स्थानीय उत्पादनको प्रवर्द्धन तथा बजारीकरणलाई समेत प्राथमिकता दिइएको थियो । उपमहानगरपालिकाले निःशुल्क स्टलको व्यवस्था गरी विभिन्न स्थानीय तह तथा संघसंस्थालाई आफ्ना उत्पादन तथा गतिविधि प्रदर्शन गर्ने अवसरसमेत दिएको थियो ।

डोटीको जोरायल गाउँपालिकालगायत विभिन्न स्थानीय तहको सहभागिताले मेलालाई सीप, रोजगारी, उद्यमशीलता र अनुभव आदानप्रदान गर्ने साझा मञ्चका रूपमा स्थापित गर्न सहयोग पुगेको उपमहानगरपालिकाको भनाइ छ ।

आगामी मेलामार्फत श्रम बजारको मागअनुसारका सीप प्रदान गर्दै युवायुवतीलाई रोजगारी तथा स्वरोजगारसँग जोड्ने लक्ष्य राखिएको छ । स्थानीय उत्पादन र उद्यमशीलताको प्रवर्द्धन गर्दै सीपयुक्त जनशक्तिलाई अवसरसँग जोड्ने गरी मेलालाई थप प्रभावकारी बनाउने तयारी भइरहेको उपमहानगरपालिकाले जनाएको छ ।

सम्बन्धित समाचार

गेटामा यही सत्रबाट एमबीबीएस सञ्चालन गर्न मेयर हमालको आग्रह धनगढीमा करोडौँको लगानीमा बनेको ज्येष्ठ नागरिक मिलन केन्द्र ६ वर्षदेखि बन्द आज हरिशयनी एकादशी : तुलसीको बिरुवा सारिँदै डा. केसीका माग सम्बोधन गर्न चिकित्सक संघको आग्रह रोगले थलिएका मुसहर परिवारको सहयोगले पलायो आशा एक बर्षमा १८७ कुपोषित बच्चाको सफल उपचार सर्पदंशबाट कैलालीमा २९ वर्षीय युवकको मृत्यु धार्मिक संवेदनशीलता व्यवस्थापनमा चुक्दा सुनसरी तनावग्रस्त