काठमाडौं । स्याङ्जाको वालिङ–१३ तारुखोलामा व्यावसायिक रूपमा अकबरे खुर्सानी खेती गरिएको छ । धान, मकैजस्ता खाद्यान्न बाली लगाउँदै आएको जमिनमा किसानले व्यावसायिक रूपमा खुर्सानी खेती थालेका हुन् । तारुखोलामा करिब ६० रोपनी क्षेत्रफलमा ७० हजारभन्दा बढी अकबरे खुर्सानीका बिरुवा लगाइएको छ ।

वालिङ नगरपालिकामा सञ्चालित कृषि विकास परियोजनाअन्तर्गत केदारनाथ कृषि फार्ममार्फत व्यावसायिक रूपमा खुर्सानी खेती गरिएको फार्मका सञ्चालक दयाराम पाठकले बताए । धान, मकै लगायतका खाद्यान्न बालीबाट भन्दा खुर्सानीबाट राम्रो आम्दानी हुने र बाँदरले क्षति नगर्ने भएकाले खुर्सानी खेती विस्तार गरिएको उनले भने ।

‘गत फागुनमा लगाएको अकबरे खुर्सानीले अहिले उत्पादन दिन थालेको छ’, सञ्चालक पाठकले भने, ‘उत्पादन भएको जति सबै बजार पठाउने गरेका छौं, मागअनुसार बजारमा पुर्‍याउन सकेका छैनौं ।’

हाल दुई–तीन दिनमा करिब ३०० किलो पाकेको खुर्सानी टिपेर बिक्री गर्ने गरिएको छ । यहाँ उत्पादित खुर्सानी यशोदा फुड्स प्रालि, बुटवलस्थित तरकारी मण्डी र स्थानीय बजारमा सहजै खपत हुने गरेको उनले बताए ।

‘खुर्सानी प्रतिकिलो २२० का दरले बिक्री भइरहेको छ’, उनले भने, ‘यहाँ उत्पादन भएको खुर्सानीले राम्रो बजार पाएको छ । बजारको समस्या छैन, उत्पादन निरन्तर भइरहेको छ ।’

पहिलो पटक व्यावसायिक रूपमा खुर्सानी उत्पादन गरिएकाले आगामी दिनमा खेतीको क्षेत्र विस्तार गर्दै लैजाने तयारी गरिएको छ । वालिङ नगरपालिकामा सञ्चालित कृषि विकास परियोजना (हेफर) ले कृषि प्राविधिक, मल्चिङ प्लास्टिक, मल तथा सुकाउने मेसिन उपलब्ध गराएको छ ।

‘खेतमा खुर्सानी पाक्ने र टिप्ने क्रम जारी छ । कामदार लगाएर खुर्सानी टिपिरहेका छौं’, उनले भने, ‘गर्न सकेको खण्डमा आफ्नै गाउँठाउँमा खेर गएको जमिनबाट पनि राम्रो आम्दानी लिन सकिने रहेछ ।’

हालसम्म करिब सात लाखको खुर्सानी बिक्री भइसकेको छ । फार्ममा खुर्सानीसँगै माछापालन र कागती खेतीसमेत गरिएको छ । उत्पादित खुर्सानी, कागती, माछालगायत कृषिजन्य वस्तु फार्मकै सवारीसाधनमार्फत कृषक तथा व्यापारीकहाँ ढुवानी गरिदिने गरिएकाले व्यापारी तथा उपभोक्तालाई सहज भएको छ ।

सम्बन्धित समाचार

कोरिडोर केन्द्रित कृषि उत्पादन कार्यक्रम सामाजिक सञ्जालमा सिकेको ज्ञानबाट ड्रागन फ्रुटखेती व्यावसायिक फलफूल खेतीतर्फ किसानको आकर्षण भेडागोठमा लालबिरका सात दशक भोटेकोशी बाढी प्रभावित क्षेत्रका नागरिकको पुनःस्थापनाका लागि सरकारद्वारा कार्यदल गठन बाढी प्रभावित ३ जिल्लामा सशस्त्र प्रहरीको १२ वटा अस्थायी बेश स्थापना चेपाङ समुदायले यसरी मनाउँदैछन् न्वागी पर्व जहाँ पाक्छ निःशुल्कमा खाना