काठमाडौं । राष्ट्रपति रामचन्द्र पौडेलले संघीय संसदको चालू अधिवेशन अन्त्य गरेका छन् ।

मन्त्रिपरिषद्को सिफारिसमा राष्ट्रपति पौडेलले १६ असोज शुक्रबार राति १२ बजेदेखि लागू हुने गरी अधिवेशन अन्त्य गरेका हुन् ।

राष्ट्रपति पौडेलले नेपालको संविधानको धारा ९३ को उपधारा (२) बमोजिम नेपाल सरकार, मन्त्रिपरिषद्को गत १३ असोजको सिफारिसमा संघीय संसदको दुवै सदनको चालू अधिवेशन अन्त्य गरेका हुन् ।

संविधानअनुसार संघीय संसद्को अधिवेशन आह्वान र अन्त्य मन्त्रिपरिषद्को सिफारिसमा राष्ट्रपतिबाट हुने व्यवस्था छ ।

संघीय संसद्को चालु अधिवेशन २८ वैशाखदेखि सुरु भएको थियो । अधिवेशनले सरकारको नीति तथा कार्यक्रम र वार्षिक बजेट पारित गरेको थियो ।

यस्तै, अध्यादेश प्रतिस्थापनका छ वटा विधेयक पारित गरी प्रमाणीकरण भएका छन् । वैकल्पिक वित्त परिचालन विधेयक, नेपाल विशेष सेवा ऐन, २०४२ को साविकको व्यवस्था जगाउने विधेयक तथा सहिद दशरथ चन्द स्वास्थ्य विज्ञान विश्वविद्यालय विधेयक पनि पारित गरी प्रमाणीकरण भएका छन् ।

प्रतिनिधि सभामा दस वटाभन्दा बढी विधेयक विभिन्न चरणमा समितिहरूमा विचाराधीन छन् ।

यसै अधिवेशनमा प्रतिनिधि सभाले जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी अध्ययन गर्न विशेष समिति गठन गरेको थियो ।

अधिवेशनका क्रममा प्रधानमन्त्री बालेन्द्र शाहले एक पटक आकस्मिक प्रश्नोत्तर कार्यक्रममा भाग लिएका थिए । यस्तै, परराष्ट्रमन्त्री तथा भूमि व्यवस्था, सहकारी, संघीय मामिला तथा सामान्य प्रशासनमन्त्रीसँग प्रश्नोत्तर भएको थियो ।

पूर्वाधार विकासमन्त्री तथा उद्योग, वाणिज्य तथा आपूर्तिमन्त्रीसँग पनि प्रतिनिधिसभामा प्रश्नोत्तर भएको थियो ।

सम्बन्धित समाचार

दमौली–भरतपुर २२० केभी प्रसारण लाइन : रुख कटानको स्वीकृति समाज कल्याण परिषद्लाई थप प्रभावकारी बनाउने तयारी, पुनर्संरचनाको प्रतिवेदन मन्त्री सिता बादीसमक्ष विपदमा कुन मन्त्रालयको तयारी के छ ? सरकार भन्छ : उच्च सतर्कता अपनाइएको छ नारायणीको बाढी खतराको तह नजिक, गण्डक ब्यारेजका सबै ढोका खुला पूर्वप्रधानन्यायाधीश चोलेन्द्र शमशेर जबरा पक्राउ पहिरोले पृथ्वी राजमार्ग र नारायणगढ–मुग्लिन सडक अवरुद्ध धापाखेलमा पहिरोमा परी तीन तले घर ढल्यो प्रहरीबाट छुटेपछि चोलेन्द्रले मागे सुरक्षा