काठमाडौं । यो वर्षको भैरव पुरस्कार व्यंग्यकार तथा कवि नरनाथ लुइँटेललाई प्रदान गरिनेछ । पुरस्कारको राशि १ लाख ११ हजार १ सय ११ रहेको छ । भैरव पुरस्कार गुठीले आइतबार एक विज्ञप्ति जारी गर्दै तीन स्रष्टालाई यो वर्षको भैरव पुरस्कार प्रदान गर्न लागिएको जनाएको छ ।
दिवंगत नेपाली साहित्यकार एवं हास्य व्यंग्यकार भैरव अर्यालको स्मृतिमा पुरस्कार स्थापना गरिएको हो । यसै पुरस्कारबाट यस वर्ष तीन जना स्रष्टालाई सम्मान गरिने भैरव पुरस्कार गुठीले जनाएको छ ।
पहिलोपटक यसै वर्षदेखि घोषणा गरिएको भैरव वांमय पुरस्कार २०७८ संस्कृतिविद् तेजेश्वरबाबु ग्वंगलाई प्रदान गरिने गुठीले जनाएको छ । पुरस्कारको राशि १ लाख १ हजार १ सय ११ रुपैयाँ रहेको छ । नेपाली कला, साहित्य, संस्कृति, संंगीत, पत्रकारितालगायतको क्षेत्रमा विशिष्ट योगदान दिने एक स्रष्टालाई अब बर्सेनि यो पुरस्कार प्रदान गरिने गुठीका अध्यक्ष रोचक घिमिरले विज्ञप्तिमार्फत जनाएका छन् ।
यस्तै, भैरव प्रतिभा पुरस्कार–२०७८ साहित्यकार विमल भौकाजीलाई प्रदान गरिने पनि गुठीले जनाएको छ । यो पुरस्कारको राशि ५५ हजार ५ सय ५५ रुपैयाँ रहेको छ ।
व्यंग्यकार लक्ष्मण गाम्नागेको संयोजकत्वमा साहित्यकार श्रीओम श्रेष्ठ रोदन र युवराज मैनाली सदस्य रहेका रहेको छनोट समितिले पुरस्कृत व्यक्तिहरूको चयन गरेको हो । कोरोनाको महामारी कम भएपछि यो पुरस्कार प्रदान गरिने गुठीका सचिव वसन्त रिजालले जनाएका छन् ।
