राजविराज । आफ्नो २५औं स्थापना दिवसलाई रजत जयन्ती समारोहको रुपमा मनाउन लागेको सशस्त्र प्रहरीले झापाको मेची पुलबाट शुरु गरेको ‘पूर्व–पश्चिम झण्डा मार्च” शुक्रवार सप्तरी आईपुगेको छ ।
सिमा सुरक्षा र सदभाव बढाउन झण्डा मार्च
सिमा सुरक्षा, सिमा क्षेत्रको नागरिकको समस्या नजिकबाट बुझ्ने प्रयास तथा आपसी सद्भाव अझ प्रगाढ बनाउने उदेश्यकासाथ यस पल्ट २५ औ स्थापना दिवसलाई सिमानाका क्षेत्र हुँदै पुर्व–पश्चिम झण्डा मार्च कार्यक्रम गर्न थालिएको सशस्त्र प्रहरी बलले जनाएको छ ।
झापाबाट पैदलै पुगेको झण्डा मार्च टोलीमा सशस्त्र प्रहरी निरिक्षकको नेतृत्वमा ३५ जना सहभागि छन् । सप्तरीको सिमानामा पुगेपछि टोलीलाई सशस्त्र प्रहरी बल, नेपाल नम्बर ६ गण हेडक्वाटर सप्तरीका प्रहरी उपरिक्षक रोशन बुढाथोकी सहितको टोलीले स्वागत गरेका थिए । दशगजा क्षेत्र नजिकै तथा सुनसरी सप्तरीको बीच सिमामा पर्ने हनुमाननगर कंकालिनी नगरपालिकाको कोशी ब्यारेज क्षेत्रमा आयोजित एक कार्यक्रमबीच सुनसरीका प्रमुख जिल्ला अधिकारी बासुदेव घिमिरे तथा सशस्त्र प्रहरी कोशी प्रदेशका डिआईजी कुमार न्योपानेले सप्तरीका प्रमुख जिल्ला अधिकारी टुवराज पोखरेल तथा मधेश प्रदेश सशस्त्र प्रहरीका डिआईजी कृष्ण ढकाललाई झण्डा हस्तान्तरण गरेका थिए ।
उक्त झण्डा लिएर शुक्रवार नै सशस्त्र प्रहरीनिरिक्षकको नेतृत्वमा ३५ सदस्यीय टोली झण्डा मार्चमा प्रस्थान गरेका छन् । उक्त टोली सिरहा जिल्ला पुगेपछि अर्को टोलीलाई झण्डा हस्तान्तरण गर्ने र फेरि त्यहाँबाट झण्डा मार्च अघि बढ्ने सशस्त्र प्रहरी उपरिक्षक रोशन बुढाथोकीले जानकारी दिए ।
सशस्त्र प्रहरीको २५औं स्थापना दिवस अगामी माघ ९ गते परेको छ । यसलाई रजत जयन्ती समारोहको रुपमा मनाउने क्रममा मेची र महाकालीबाट एकैसाथ झण्डा मार्च सुरु भएको हो । दुबै तर्फको टोली माघ ७ गते पर्साको ठोरीमा पुग्नेछन् । त्यसपछि विशेष समारोहको आयोजना गरिने कार्यक्रम रहेको सशस्त्र प्रहरीले जनाएको छ ।
