काठमाडौं । कुवेतबाट एकैपटक ३ सयभन्दा बढी नेपालीलाई देश निकाला (डिपोर्ट) गरिएको छ । कुवेतको आन्तरिक मामिला मन्त्रालय र नेपाली दूतावासको समन्वयमा नियम उल्लंघन गरेका नेपालीलाई बुधबार स्वदेश फर्काइएको हो ।
प्राप्त जानकारीअनुसार, कुवेतमा विभिन्न प्रकारका कानुनी तथा प्रशासनिक नियम उल्लंघन गरेका नेपाली नागरिकलाई कुवेत सरकारले एकै पटक डिपोर्ट गरेको हो । ती सबैलाई कुवेत एयरवेजमार्फत कुवेत अन्तर्राष्ट्रिय विमानस्थलबाट भैरहवास्थित गौतम बुद्ध अन्तर्राष्ट्रिय विमानस्थलतर्फ पठाइएको हो ।
गैरआवासीय नेपाली संघ (एनआरएनए) कुवेतका अनुसार सोही विमानमार्फत विभिन्न कारणले कुवेतमा निधन भएका ९ जना नेपाली नागरिकको शवसमेत नेपाल पठाइएको छ । यस घटनाले विदेशमा रहेका नेपालीहरूको अवस्था र सुरक्षाको विषयमा पुनः गम्भीर प्रश्न उठाएको छ ।
सो विशेष उडान बुधबार साँझ करिब ६ बजे भैरहवा अन्तर्राष्ट्रिय विमानस्थलमा अवतरण गर्ने जनाइएको छ । कुवेतको आन्तरिक मामिला मन्त्रालयको निर्देशनमा डिपोर्ट गरिएका नेपालीहरूलाई स्वदेश फर्काउनका लागि विशेष व्यवस्था गरिएको थियो ।
त्यसैगरी, सो दिन कुवेत अन्तर्राष्ट्रिय विमानस्थल अन्य यात्रुहरूको लागि पूर्ण रूपमा बन्द गरिएको बताइएको छ । केवल डिपोर्टीहरूलाई फर्काउनकै लागि सो उडान सञ्चालन गरिएको थियो ।
वैदेशिक रोजगारीका लागि कुवेत पुगेका नेपालीहरू विभिन्न कारणले गैरकानुनी अवस्थामा बस्न बाध्य हुने, काम परिवर्तन गर्ने, भिसा अवधि नवीकरण नगर्नेलगायतका कारणले यस्ता समस्या आउने गरेको देखिन्छ ।
यस घटनाले वैदेशिक रोजगारीमा जाने नेपालीले सम्बन्धित देशको कानुन पालना गर्नुपर्ने आवश्यकतालाई थप स्पष्ट पारेको छ । सरकार तथा सम्बन्धित निकायहरूले यस्ता घटनाको पुनरावृत्ति रोक्न र वैदेशिक रोजगारीमा जाने नेपालीको सुरक्षा सुनिश्चित गर्न प्रभावकारी कदम चाल्नुपर्ने आवश्यकता देखिएको छ ।
