इलाम । तेस्रो इलाम गोल्ड कपको उपाधि मच्छिन्द्र फुटबल क्लबले हात पारेको छ । न्युरोड टिम (एनआरटी) माथि २–० को जित निकाल्दै उपाधि उचालेको हो । मध्यान्तरपछिको सुरुवाती समयमा नै मच्छिन्द्रले खेल आफ्नो पक्षमा पार्न सफल भयो । ४७ मिनेटमा सौरव लिम्बुले उत्कृष्ट गोल गर्दे टिमलाई अग्रता दिलाए भने ५० मिनेटमा मिलन राईले गोल गर्दै बलियो बनाए ।

खेलको सुरुवातदेखि नै एनआरटीले केही अवसर सिर्जना गरेको थियो । पाँचौँ मिनेटमा शिशिर लेखीको प्रहार फ्रेममा पर्न सकेन त्यस लगत्तै विज्ञान खड्काको प्रयास पनि आकासिएको थियो । १९औँ मिनेटमा आदित्य शाक्यको क्रसमा शिशिरले गरेको प्रहार मच्छिन्द्रका गोलरक्षक प्रदीप बुढाथोकीले सहजै नियन्त्रणमा लिए ।

२२औँ मिनेटमा विवेक गुरुङको फ्रिकिक सीधै गोलरक्षकको हातमा पुगेको थियो । त्यसपछि पुन फ्रिकिकमा आशिष् गुरुङले प्रहार गरे पनि रिबाउन्डलाई सदुपयोग गर्न नसक्दा एनआरटी अग्रता लिन चुकेको थियो । ३२औँ मिनेटमा दिवाकर चौधरीको कर्नरमा रेवतीराम भण्डारीले प्रहार गरे पनि बल पोस्टबाहिर गयो ।

मच्छिन्द्रले पनि पहिलो हाफमा केही अवसर गुमाएको थियो । ११औँ मिनेटमा डिबक्सभित्रको घम्साघम्सीमा मिलनले फिनिसिङ गर्न सकेनन् भने २५औँ मिनेटमा उनको प्रहार आकासियो । ३७औँ मिनेटमा सौरव लिम्बुले मध्य भागबाट अघि बढ्दै प्रहार गरे पनि फ्रेममा राख्न सकेनन् । ४७औँ मिनेटमा सौरव लिम्बुले गोल गर्दै मच्छिन्द्रलाई अग्रता दिलाए । त्यसको दुई मिनेटपछि अर्थात् ५०औँ मिनेटमा मिलन राईले गोल थप्दै टोलीको अग्रता दोब्बर बनाए ।

६५औँ मिनेटमा मिलनले अर्को राम्रो अवसर गुमाए भने खेलभरि मच्छिन्द्रले आक्रमणलाई निरन्तरता दिएको थियो । एनआरटीले पनि केही प्रयास गरे पनि मच्छिन्द्रका गोलरक्षक प्रदीप बुढाथोकी बाधक बने । विजेता टिम मच्छिन्द्रले १० लाख र उपविजेता न्युरोडले ५ लाख रुपैयाँमा चित्त बुझाएको छ ।

खेलमा उत्कृष्ट प्रदर्शन गरेका मच्छिन्द्रका प्रदीप बुढाथोकी म्यान अफ द म्याच घोषित भए । उत्कृष्ट गोलरक्षकको उपाधि मच्छिन्द्रकै प्रदीप भण्डारीले जित्दा उत्कृष्ट डिफेन्डर एनआरटीका आशिष् गुरुङ घोषित भए । त्यस्तै, उत्कृष्ट मिडफिल्डर युवराज ढकाल र उत्कृष्ट प्रशिक्षक मच्छिन्द्रका प्रवेश कटुवाल बने ।

प्रतियोगितामा उदीयमान आयोजकतर्फ रेड हर्षका विवेक सुनार सम्मानित भए । सर्वाधिक गोलकर्ता मच्छिन्द्रका मिलन चाम्लिङ बने, जसले तीन गोल गरेका थिए । प्रतियोगिताको सर्वोत्कृष्ट खेलाडी (म्यान अफ द टुर्नामेन्ट) मच्छिन्द्रकै सनिश श्रेष्ठ घोषित भए ।

सम्बन्धित समाचार

यु–१६ क्रिकेटः बैतडीमा निःशुल्क प्रशिक्षण प्रधानमन्त्री कपः आजको खेलमा गण्डकी प्रदेश विजयी अन्तरपालिका पुरुष भलिवल प्रतियोगिताको उपाधि पाँचखपनले जित्यो रोलिङसँग फिदिम ३–० ले स्तब्ध ‘महिला फुटबल खेलाडीले चन्द्रनिगाहपुरको पहिचान बनाए’ डिफेन्डिङ च्याम्पियन एनआरटीको संघर्षपूर्ण जित आइसिसी विश्वकप लिग–२ : नेपाल र ओमान बीचको खेल सुरु भानुआतुले नेपाललाई दियो ९८ रनको लक्ष्य