मकवानपुर । उत्कृष्ट खेलाडी उत्पादन गर्ने उद्देश्यले पृतनापति ट्रफी–२०८३ अन्तर्गतका विभिन्न खेलकुद प्रतियोगिता सोमबारदेखि सुरु भएका छन् । उद्घाटनको पहिलो खेल फुटबलमा श्री गोरखबहादुर गण र श्री भैरव गणबीच प्रतिस्पर्धा भएको थियो । उक्त खेलमा श्री गोरखबहादुर गणले २–१ गोल अन्तरले श्री भैरव गणलाई पराजित गर्दै विजयी सुरुआत गरेको छ ।

विक्रम संवत् २०६५ सालदेखि प्रधान सेनापति ट्रफी सञ्चालन हुँदै आएको सन्दर्भमा यस वर्ष पनि पृतनापति ट्रफी–२०८३ आयोजना गरिएको हो । श्री नं। ७ बाहिनी अड्डाअन्तर्गत श्री गोरखबहादुर गणमा सञ्चालन भएको प्रतियोगिताको उद्घाटन मध्य पृतना हेडक्वार्टरका पृतनापति उपरथी विष्णु कुमार खड्काले गर्नुभयो । उहाँले रेफ्रीलाई बल हस्तान्तरण गर्दै फुटबल खेलको औपचारिक शुभारम्भ गरेका थिए ।

त्यस्तै, मंगलबार दिउँसो ४ बजे श्री शेर गण र श्री नयाँ सबुज गणबीच खेल हुने गणपति प्रमुख सेनानी रविन्द्रकुमार श्रेष्ठले जानकारी दिए । प्रतियोगिताको चापलाई मध्यनजर गर्दै धादिङ, नुवाकोट र चितवन जिल्लामा समेत खेलहरू सञ्चालन गरिँदै आएको उनले बताए । उद्घाटनका दिन मार्चपाससँगै शेर गण, नयाँ सबुज गण र भैरव गणलगायतले झाँकी प्रदर्शन गरेका थिए ।

यस वर्षको पृतनापति ट्रफी–२०८३ वैशाख १४ गतेदेखि २८ गतेसम्म सञ्चालन हुने तय भएको छ । प्रतियोगितामा सामूहिक र व्यक्तिगत दुवै विधाका खेलहरू समावेश गरिएका छन् । सामूहिकतर्फ भलिबल, फुटबल र बास्केटबल तथा व्यक्तिगततर्फ एथलेटिक्स, जुडो, तेक्वान्दो, बक्सिङ र स्विमिङ खेलहरू समावेश छन् ।

प्रतियोगितालाई विभिन्न युनिटमा विकेन्द्रीकृत गरी सञ्चालन गरिनेछ । जसअनुसार मध्य पृतना हेडक्वार्टरमा स्विमिङ र बक्सिङ, श्री नं। ६ बाहिनी अड्डा (नुवाकोट) मा बास्केटबल, श्री भैरवनाथ गण (धादिङ) मा भलिबल, श्री नं. ७ बाहिनी अड्डा (मकवानपुर) अन्तर्गत श्री गोरखबहादुर गणमा फुटबल र एथलेटिक्स तथा श्री नयाँ सबुज गण ९चितवन० मा तेक्वान्दो र जुडो प्रतियोगिता सञ्चालन हुनेछन् ।

विभिन्न स्थानमा खेलहरू सञ्चालन गर्दा सम्बन्धित क्षेत्रमा खेल पूर्वाधार तथा भौतिक संरचनाको विकास हुनुका साथै प्रदेश, जिल्ला र स्थानीय तहका खेलकुद निकायसँग समन्वय र सहकार्य बढ्ने विश्वास लिइएको महासेनानी सुशीलकुमार थापाले बताए । यसले नागरिक र सैनिकबीचको सम्बन्ध थप सुदृढ बनाउनुका साथै आर्थिक रूपमा पनि मितव्ययी हुने अपेक्षा गरिएको छ ।

प्रतियोगिता समापनपछि प्रतिभाशाली खेलाडीलाई थप प्रशिक्षण दिई आगामी प्रधान सेनापति ट्रफीलाई अझ उत्कृष्ट बनाउने अपेक्षा गरिएको थापाले बताउनुभयो । देशलाई खेलकुद क्षेत्रमा सक्षम खेलाडी उत्पादन गर्ने मुख्य लक्ष्यका साथ मध्य पृतना हेडक्वार्टरअन्तर्गतका विभिन्न बाहिनी र गणबाट छनोट गरिएका उत्कृष्ट खेलाडीहरू प्रतियोगितामा सहभागी गराइनेछ ।

वैशाख २८ गतेसम्म सञ्चालन हुने प्रतियोगिताका विजेता खेलाडीलाई प्रधान सेनापति ट्रफीका लागि क्लोज क्याम्पमा राखिने जनाइएको छ । प्रतियोगितामा ६ र ७ नम्बर बाहिनीका साथै शेर गण, भैरवबहादुर गण र नयाँ सबुज गणका खेलाडी सहभागी छन् । भलिबल, फुटबल, बास्केटबल र एथलेटिक्ससहित आठ विधामा प्रतिस्पर्धा हुनेछ ।

विभिन्न विधाका खेलहरू सम्बन्धित गण तथा बाहिनीमा सञ्चालन गरिनेछन् भने समापनका दिन सुपारेतार ब्यारेकको खेल मैदानमा फुटबलको फाइनल खेल हुने जनाइएको छ । ४७१ पदक रहेको प्रतियोगितामा १२५ महिला खेलाडीसहित करिब ५५० खेलाडी सहभागी हुनेछन् ।

मध्य पृतना हेटौंडाले यसअघि प्रधान सेनापति ट्रफी प्रतियोगितामा पाँच पटक उपाधि जित्न सफल भएको छ ।

सम्बन्धित समाचार

कोइलाको सकिएपछि हेटौँडा सिमेन्ट उद्योगद्वारा उत्पादन बन्द पाँचखपनले जित्यो अन्तरपालिका पुरुष भलिबल उपाधि इटालीविरुद्धको खेलमा नेपालले टस जितेर ब्याटिङ गर्दै काठमाडौंमा ह्विलचियर बास्केटबल प्रतियोगिता सम्पन्न यूएईविरुद्ध नेपालले गुमायो पहिलो विकेट चारदिने नमूना बाल नगरसभा सम्पन्न वैशाख १८ देखि रारा गोल्डकप सञ्चालन नेपाल भानुआतुसँग पराजित