पोखरा । पोखरा महानगरपालिकाले पोखरा–९, पृथ्वीचोकस्थित हङकङ बजारअगाडिका विभिन्न संरचनामा बिहीबार डोजर लगाएर भत्काएको छ । जसअनुसार सहारा क्लब पोखरा, सामुदायिक प्रहरी सेवा, जिफन्ट गण्डकी, नेपाल ट्रेड युनियन कांग्रेस, हिमाली सांस्कृतिक परिवारको भवन, पसलहरु, सार्वजनिक शौचालयसमेतका संरचना भत्काइएको हो ।

पोखरा उपत्यका नगर विकास समितिको जग्गा अतिक्रमण गरेर विभिन्न संघसंस्थाले भवन बनाएर लामो समयदेखि सटर भाडामा लगाउँदै आएका थिए ।

पोखरा महानगरपालिका र पोखरा उपत्यका नगर विकास समितिले सार्वजनिक तथा सरकारी जग्गा खाली गर्न यसअघि सार्वजनिक सूचना जारी गरेकोमा त्यसको म्याद सकिएको हो । बिहीबार बिहान ११ बजेपछि सुरक्षाकर्मी, जनप्रतिनिधि समेतको सहयोगमा दुई डोजर चलाइएको थियो ।

खाली गर्न जारी गरिएको सूचनाबमोजिम कतिपय संस्थाले आफ्ना भवन तथा संरचना खाली गराइसकेका थिए ।

मोफसलको चर्चित क्लब सहारा क्लब पोखराले आफ्ना सामान दोबिल्लास्थित सहारा एकेडेमीमा लगेको छ । यसैगरी, जिफन्ट, ट्रेड युनियन कांग्रेस, सामुदायिक प्रहरी सेवा, हिमाली सांस्कृतिक परिवारसमेतले आफ्ना सामान धमाधम सारेका थिए ।

महानगरपालिकाले आयोजना गरेको सर्वदलीय–सर्वपक्षीय छलफलपछि राजनीतिक दलका भातृ संस्थालगायतले भवन खाली गर्न राजी भएका थिए ।

पोखरा उपत्यका नगर विकास समितिको स्वामित्वमा रहेको पृथ्वीचोक र आसपासको जग्गा विभिन्न संघसंस्था तथा व्यक्तिहरूले लामो समयदेखि भोगचलन गर्दै आउनुका साथै भाडामा लगाएर आम्दानी गर्दै आएका थिए ।

पोखरा महानगरपालिकाका प्रमुख धनराज आचार्यले अतिक्रमित संरचना हटाएर दुई लेनको सडक निर्माण गरिने बताए । उक्त सडक निर्माणपछि पृथ्वीचोकको ट्राफिक व्यवस्थापन सहज हुने उनले जनाए ।

यसैबीच, पोखरा महानगरपालिकाले फिर्केखोला घरको मापदण्ड मिचेर बनाइएका अवैध संरचनाहरू भत्काउने क्रम जारी राखेको छ । ५ दिनदेखि लगातार काम भइरहेको हो । फिर्केखोला घरका कुल १ सय ६० संरचनामाथि डोजर लगाइने महानगरले जनाएको छ । तीमध्ये दुईतिहाइ संरचना भत्किसकेका छन् ।

सम्बन्धित समाचार

मुस्ताङबाट झण्डै छ सय कार्टुन ‘विद्युतीय चुरोट’ बरामद बेनीलाई कटान र बाढीबाट जोगाउन नदी नियन्त्रण योजना सडक किनारका ५१ व्यावसायिक सटरमा डोजर फिर्के खोलाघरका संरचना हटाउन तीन तिरबाट डोजर चलाइँदै मुस्ताङको लोमान्थाङ गाउँपालिकामा कर सेवा सुरु गुप्तेश्वर गुफामा पर्यटकको भीडः एकै दिनमा पाँच लाखको टिकट बिक्री सिप्लिकान र चिउरीका बिरुवा अनुदानमा वितरण गर्दै महानगर