काठमाडौं । नेपाल वैदेशिक रोजगार व्यवसायी संघको अध्यक्षमा डिकबहादुर खत्री (कुमार) विजयी भएका छन् । संघको विशेष साधारणसभा तथा निर्वाचनबाट भारी मत ल्याएर अध्यक्षमा विजयी भएका खत्री झन्डै पुरै प्यानल सहित विजयी भएका हुन् ।
नेकपा एमाले निकट प्रगतिशील वैदेशिक रोजगार व्यवसायी मञ्च नेपाल र नेपाली कम्युनिस्ट पार्टीनिकट वैदेशिक रोजगार व्यवसायी गणतान्त्रिक मञ्च तथा कांग्रेस निकट असन्तुष्ट केही व्यवसायी मिलेर बनेको संयुक्त व्यवसायी समूहको तर्फबाट विजयी भएका खत्रीले सो निर्वाचनमा ३ सय ४७ मत प्राप्त गरेका थिए । अध्यक्षका उनका प्रतिस्पर्धी उम्मेदवारहरू मेघनाथ भुर्तेलले १ सय ९२ मत ल्याएका थिए भने हरिबहादुर पाण्डे क्षेत्रीले १ सय ७० मत पाएका थिए ।
भुर्तेलको समूह नेपाल लोकतान्त्रिक वैदेशिक रोजगार व्यवसायी एसोसिएसनको तर्फबाट चुनावी मैदानमा थियो । त्यस्तै, पाण्डेको समूह नेपाल वैदेशिक रोजगार व्यवसायी एकता समिति, राष्ट्रिय स्वतन्त्र पार्टीनिकट स्वतन्त्र वैदेशिक रोजगार व्यवसायीकोतर्फबाट प्रतिस्पर्धामा उत्रिएको थियो । सो निर्वाचनबाट संघ प्रथम उपाध्यक्षमा महेश बस्नेत ,द्धितीय उपाध्यक्षमा अनिल बोगटी, तृतीय उपाध्यक्षमा लक्ष्मण पौडेल, महासचिवमा हीराबहादुर (हरि) डाँगी, सचिवमा केदारनाथ अधिकारी र कोषाध्यक्षमा धनमायाँ सिन्जाली विजयी भएका छन् ।
यसैगरी, संघ कार्यसमिति सदस्यहरूमा रमा खड्का, विवश ढुंगाना, धुर्व जीसी, तारामणि राई, तारा तामाङ, रविन्द्र राई, भावना गजुरेल, बाबुराम न्यौपाने, गीता राउत, दीक्षा थपलिया विजयी भएका छन् ।
नवनिर्वाचित खत्री समूहको प्रगतिशील प्यानलबाट संघको कुल १७ सदस्यीय कार्यसमितिमा ७ पदाधिकारीमध्ये ६ वटै र १० जना कार्यसमिति सदस्यमध्ये ८ सदस्य विजयी भएका छन् । सो निर्वाचनमा लोकतान्त्रिक एशोसिएशनको समूहबाट तृतीय उपाध्यक्षमा विजयी पौडेल र दुई जना सदस्य राउत तथा थपलिया विजयी भएका हुन् ।
कुल ७ सय ७६ मतदाता रहेको संघको यस निर्वाचनमा अध्यक्ष,पदाधिकारी र कार्यसमिति सदस्य सहित तीनवटा भिन्दाभिन्दै समूहबाट ५१ जना व्यवसायीको उम्मेदवारी परेको थियो । संघ निर्वाचन समितिका प्रमुख निर्वाचन अधिकृत टंकबहादुर राउतले कुल ७ सय ७६ मतदातामध्ये ७ सय १९ मत खसेको बताए ।
उनले आइतबार राति ८ बजेबाट सुरु भएको निर्वाचनको अन्तिम मत परिणाम सोमबार बिहान मात्र सार्वजनिक भएको जानकारी गराए । प्रमुख निर्वाचन अधिकृत राउतले यस निर्वाचनमा देखिएको व्यवसायीको उत्साहले संघको ऐतिहासिक निर्वाचन भएको दाबी गरे ।
