धनगढी । धनगढी उपमहानगरपालिकाले सञ्चालन गरेको प्रजनन स्वास्थ्यसम्बन्धी विशेष स्क्रिनिङ कार्यक्रमअन्तर्गत २ हजार ३२१ महिलाको पाठेघरको मुखको क्यान्सर (एचपिभी डीएनए) परीक्षण गरिएको छ । परीक्षणका क्रममा २३३ जनामा एचपिभी संक्रमण (पोजेटिभ) देखिएको उपमहानगरपालिकाले जनाएको छ ।

उपमहानगरपालिकाका अनुसार २०८२ चैत २५ गतेदेखि २०८३ जेठ १० गतेसम्म नगरका २० स्थानमा प्रजनन स्वास्थ्य शिविर सञ्चालन गरिएको थियो । शिविरमार्फत पाठेघरको मुखको क्यान्सर, आङ खस्ने, फिस्टुला तथा स्तन क्यान्सरको स्क्रिनिङ गरिएको थियो ।

तथ्याङ्कअनुसार एचपिभी डीएनए परीक्षण गराएकामध्ये करिब १० प्रतिशत महिलामा संक्रमण पुष्टि भएको छ । उमेर समूहअनुसार ३० देखि ४४ वर्ष उमेर समूहका महिलामा संक्रमणको दर बढी देखिएको स्वास्थ्य शाखा प्रमुख योगेश अवस्थीले जानकारी दिए । यस उमेर समूहका २२३ महिलामा एचपिभी संक्रमण देखिएको छ भने ४० वर्षभन्दा माथिका उमेर समूहका १० महिलामा संक्रमण पुष्टि भएको छ ।

त्यसैगरी, आङ खस्ने समस्याको परीक्षण गरिएका महिलामध्ये ४० जनामा समस्या पहिचान भएको थियो। तीमध्ये १० जनालाई रिङ पेसरी प्रयोग गरी उपचार गरिएको उपमहानगरपालिकाको स्वास्थ्य शाखाले जनाएको छ ।
शिविरअन्तर्गत २ हजार २०८ महिलाको स्तन क्यान्सर तथा फिस्टुलासम्बन्धी परीक्षणसमेत गरिएको थियो । परीक्षणमा सहभागी सबै महिलाको नतिजा सामान्य रहेको जनाइएको छ ।

उपमहानगरपालिकाले एचपिभी पोजेटिभ नतिजा आउनु भनेको पाठेघरको मुखको क्यान्सर भइसकेको भन्ने अर्थ नलाग्ने स्पष्ट पारेको छ । एचपिभी संक्रमण क्यान्सरको जोखिमसँग सम्बन्धित संकेत भए पनि समयमै थप परीक्षण, परामर्श र आवश्यक उपचारबाट जोखिम न्यूनीकरण गर्न सकिने स्वास्थ्यकर्मीहरूको भनाइ छ ।

उपमहानगरपालिकाले महिलाहरूलाई नियमित स्वास्थ्य परीक्षणमा सहभागी हुन र प्रजनन स्वास्थ्यसम्बन्धी समस्या’bout सचेत रहन आग्रह गरेको छ ।

सम्बन्धित समाचार

चैतन्य पाठशालाद्वारा स्टेशनरी र खाद्यान्न सहयोग धनगढी उपमहानगरद्वारा ३ वर्षमा ९१७ विद्यार्थीलाई छात्रवृत्ति धनगढी उपमहानगरद्वारा नौ सयभन्दा बढी विद्यार्थीलाई छात्रवृत्ति सुन्दरहरैंचामा बाल सञ्जालद्वारा लागूऔषध दुर्व्यसनी चेतना विराटनगर महानगरपालिकाका सबै वडा पूर्णखोप सुनिश्चित गर्मी छल्न विद्यालयहरू धमाधम बन्द गरिँदै अमरगढी–७ मा सेवा प्रवाहको नयाँ अध्याय सुदूरपश्चिममा रेबिजविरुद्धको खोप अभाव