काठमाडौं । नक्कली भुटानी शरणार्थी प्रकरणमा काठमाडौं जिल्ला अदालतले २ जना पूर्वप्रधानमन्त्रीसहित सबै प्रतिवादीको सजाय निर्धारण गरेको छ ।

फैसलाअनुसार पूर्वउपप्रधानमन्त्री तथा पूर्वगृहमन्त्री टोपबहादुर रायमाझीलाई ४ वर्ष कैद र ४० हजार रुपैयाँ जरिमाना गरिएको छ भने पूर्वगृहमन्त्री बालकृष्ण खाँणलाई २ वर्ष कैद र २० हजार रुपैयाँ जरिमाना तोकिएको छ ।

अदालतले भुटानी मानवअधिकारबादी नेता टेकनाथ रिजाललाई २ वर्ष कैद र २० हजार रुपैयाँ जरिमाना तोकेको छ । त्यस्तै पूर्वसचिव टेकनारायण पाण्डे, केशवप्रसाद दुलाल, सानु भण्डारी, सागर राई, सन्देश शर्मा, डा. इन्द्रजीत राई र गोविन्दकुमार चौधरीलाई जनही ४ वर्ष कैद र ४० हजार रुपैयाँ जरिमाना हुने फैसला गरेको छ ।

यस्तै, नरेन्द्र केसी, शमशेर मियाँ, हरिभक्त महर्जन तथा निरञ्जनकुमार खरेललाई जनही १ वर्ष कैद र १० हजार रुपैयाँ जरिमाना सुनाइएको छ ।

नक्कली भुटानी शरणार्थी प्रकरणमा जिल्ला अदालत काठमाडौंले २४ असारमा एमाले नेता रायमाझी, कांग्रेस नेता खाँण, पूर्व गृहसचिव टेकनारायण पाण्डे, भुटानी मानवअधिकारवादी नेता टेकनाथ रिजाललगायतलाई दोषी ठहर गरेको थियो ।

जिल्ला अदालतका न्यायाधीश तेजबहादुर खड्काको इजलासले मंगलवार विपक्षी बनाइएका केशव प्रसाद दुलाल, सानु भण्डारी, सागर राई, डा इन्द्रजीत राई, गोविन्द कुमार चौधरी, आङटावा शेर्पा, टेकनारायण पाण्डे, र टोपबहादुर रायमाझीलाई संगठित अपराध, राज्यविरुद्धको कसुर र ठगी अभियोगमा दोषी ठहर गरेको थियो ।

प्रतिवादीहरूमध्येका कांग्रेस नेता खाँण, नेता रिजाल, नरेन्द्र केसी, शमशेर मियाँ, हरिभक्त महर्जन, निरञ्जनकुमार खरेललाई भने राज्यविरुद्धको कसुरमा मतियारका रूपमा काम गरेको अदालतको ठहर छ ।

नक्कली भुटानी शरणार्थी प्रकरणमा मुद्दा चलाइएका रामशरण केसी, टंक कुमार गुरुङ, टोपबहादुर रायमाझीका छोरा सन्दीप रायमाझी, एमाले उपाध्यक्ष रामबहादुर थापा बादलका छोरा प्रतीक थापा, लक्ष्मी महर्जन, केशव तुलाधर र आशिष बुढाथोकीले भने अभियोगबाट सफाइ पाएका छन् ।

अदालतले कसुर ठहर गरे पनि कसलाई कति सजाय गर्ने भनेर २९ असारमा फैसला सुनाउने मिति तय गरेको छ । कसुर ठहर भएकामध्ये एमाले नेता रायमाझी थुनामै छन् भने कांग्रेस नेता खाँण धरौटी बुझाएर रिहा भएका थिए ।

कसलाई कति सजाय ?
टोपबहादुर रायमाझी ४ वर्ष ४० हजार रुपैयाँ
बालकृष्ण खाँण २ वर्ष २० हजार रुपैयाँ
टेकनाथ रिजाल २ वर्ष २० हजार रुपैयाँ
टेकनारायण पाण्डे ४ वर्ष ४० हजार रुपैयाँ
केशवप्रसाद दुलाल ४ वर्ष ४० हजार रुपैयाँ
सानु भण्डारी ४ वर्ष ४० हजार रुपैयाँ
सागर राई ४ वर्ष ४० हजार रुपैयाँ
सन्देश शर्मा ४ वर्ष ४० हजार रुपैयाँ
डा. इन्द्रजीत राई ४ वर्ष ४० हजार रुपैयाँ
गोविन्दकुमार चौधरी ४ वर्ष ४० हजार रुपैयाँ
नरेन्द्र केसी १ वर्ष १० हजार रुपैयाँ
शमशेर मियाँ १ वर्ष १० हजार रुपैयाँ
हरिभक्त महर्जन १ वर्ष १० हजार रुपैयाँ
निरञ्जनकुमार खरेल १ वर्ष १० हजार रुपैयाँ

सम्बन्धित समाचार

मानव–वन्यजन्तु द्वन्द्व न्यूनीकरणमा मन्त्री चौधरीको जोड लालपुर्जाको आश्वासन दिन सुकुमवासीमाझ मन्त्रीको टोली ‘सञ्चारमाध्यमलाई त्रसित पार्ने प्रयास अस्वीकार्य’ आम महिला मोर्चाको केन्द्रीय अध्यक्षमा कुमारी बबिता शङ्कास्पद गाडी तेर्साएर गरिएको अवरोध प्रयासको विषय संसदमा उठ्यो राष्ट्रपति पौडेलसँग उपराष्ट्रपति यादवको भेट पूर्वप्रदेश प्रमुख राजेश अहिराज बलात्कार मुद्दामा दोषी ठहर ६७ जिल्लाका २४ हजार पीडितलाई ‘न्याय दिने’ प्रतिवेदन कार्यान्वयनमा