उदयपुर । गैँडा छाप सिमेन्ट उत्पादन गर्दै आएको सरकारी स्वामित्वको उदयपुर सिमेन्ट उद्योग लिमिटेड एक सातादेखि नेतृत्वविहीन भएको छ । निमित्त महाप्रबन्धक कोविद काफ्ले अनिवार्य अवकाशमा गएपछि उद्योगमा नयाँ कार्यालय प्रमुख नियुक्त हुन नसक्दा प्रशासनिकदेखि आर्थिक काम समेत ठप्प भएका छन् । जीर्ण अवस्थामा रहेको सिमेन्ट उद्योग चालू आर्थिक वर्ष दुई पटक गरी मुस्किलले १५ दिन सञ्चालन भएको थियो ।

उद्योग बन्द रहेको अवस्थामा नेतृत्वसमेत नहुँदा कर्मचारीहरू उद्योग परिसरमा भेला भएर समय कटाउन बाध्य भएका छन् । गत २४ असारमा निमित्त महाप्रबन्धक काफ्लेले औपचारिकरूपमा जिम्मेवारी छाडेपछि उद्योगमा कुनै पनि निर्णय गर्ने अधिकार प्राप्त अधिकारी छैनन् । उद्योगले नयाँ निमित्त महाप्रबन्धक नियुक्तिका लागि पाँच जनाको नाम उद्योग, वाणिज्य तथा आपूर्ति मन्त्रालयमा सिफारिस गरे पनि अहिलेसम्म कुनै निर्णय हुन सकेको छैन ।

उद्योगका सातौँ तहका कर्मचारी वीरबहादुर कार्कीका अनुसार आठौँ तहका वैद्यनाथ झा, असल राई, कृष्ण केसी, टिका कुँवर र हरिप्रसाद सुदेवीको नाम मन्त्रालयमा पठाइएको छ । सिफारिसमा परेका कर्मचारीमध्ये वैद्यनाथ झाले पहिले आफू, असल राई र कृष्ण केसीको नाम मात्र सिफारिस भएको तर पछि टिका कुँवर र हरिप्रसाद सुदेवीको नाम समेत थपिएको बताए । उनका अनुसार अहिले उद्योगमा कार्यालय प्रमुख नै नभएकाले सामान्य प्रशासनिक कामसमेत हुन सकेको छैन । ‘कुनै पत्र आउँछ भने त्यसको जवाफ कसले दिने ? निर्णय कसले गर्ने ? अहिले प्रशासनिक र आर्थिक प्रशासन दुवै ठप्प छ । उद्योग चलाउने जिम्मेवारी लिने व्यक्ति नै छैन, उद्योग पनि पूर्णरूपमा बन्द छ,’ झाले भने ।

उद्योग लामो समयदेखि बन्द रहेकाले अधिकांश कर्मचारी नियमित कामविहीन छन् । उद्योगमा कार्यरत १७५ स्थायी कर्मचारीमध्ये धेरैजसो उद्योग परिसरमै भेला भएर दिन बिताउने गरेका छन् भने केही व्यक्तिगत काममा निस्किने गरेका छन् । यता उद्योग सुरक्षाका लागि खटिएका ५८ जना सुरक्षाकर्मी भने नियमित ड्युटीमै छन् । झाका अनुसार कर्मचारीहरू उद्योगको क्वार्टरमा बसिरहनु भन्दा उद्योगमै आएर भेटघाट र गफ गरेर समय बिताउने अवस्था बनेको छ । ‘क्वार्टरमा दिनभरि बस्न मन लाग्दैन । त्यसैले उद्योगमै आएर भेटघाट गर्छौं । अब हाजिरी कसले गराउने ? कसलाई कार्यालय प्रमुख मान्ने ? त्यो पनि अन्योलमै छ,’ उनले भने ।

उद्योगको व्यवस्थापन अभावका कारण आर्थिक क्षति पनि बढ्दै गएको कर्मचारीहरूको भनाइ छ । उनका अनुसार प्याकिङका लागि आवश्यक बोरा खरिद गर्न नसक्दा करिब ६ करोड रुपैयाँबराबरको सिमेन्ट र क्लिंकर गोदाममै थन्किएको छ । लामो समयसम्म बिक्री हुन नसके ती सामग्री गुणस्तर गुमाएर नष्ट हुने जोखिम बढेको उनीहरूको दाबी छ । ‘हामीसँग तयारी सिमेन्ट छ, तर बोरा किन्न नसक्दा प्याकिङ गरेर बिक्री गर्न सकेका छैनौं । यसले करोडौं रुपैयाँको सामग्री जोखिममा परेको छ । मन्त्रालयले पनि समयमै निर्णय नगर्दा समस्या झन् जटिल बनेको छ,’ झाले भने ।

उद्योग परिसरको भौतिक अवस्था पनि दिनप्रतिदिन जीर्ण बन्दै गएको छ । लामो समयदेखि सञ्चालन र नियमित सरसफाइ हुन नसक्दा उत्पादन शाखाका उपकरणमा लेउ पलाएको छ । कार्यालय परिसर झारपातले ढाकिएको छ भने कवाडी सामाग्री यत्रतत्र छरिएको देखिन्छ । आवश्यक मर्मत सम्भार नहुँदा करोडौं मूल्यका मेसिनरी समेत बिग्रिने जोखिम बढ्दै गएको कर्मचारीहरू बताउँछन् ।
उद्योगका कर्मचारीहरूले तत्काल नेतृत्व नियुक्त गरी प्रशासनिक काम सुचारु गर्न, गोदाममा थन्किएको सिमेन्ट बिक्रीको व्यवस्था मिलाउन र उद्योग पुनः सञ्चालनका लागि स्पष्ट कार्ययोजना सार्वजनिक गर्न सरकारसँग माग गरी रहेको जानकारी दिए । उनीहरूका अनुसार उद्योग जति लामो समय नेतृत्व विहीन र बन्द रहन्छ, त्यति नै सरकारी लगानी, भौतिक संरचना र जनशक्ति थप संकटमा पर्दै जाने कर्मचारीहरूको भनाइ छ ।

उद्योगमा उत्पादन रोकिँदा उद्योगका मेसिनहरू निष्क्रिय बनेका छन् भने केही उपकरणमा माकुराको जालो लाग्न थालेको कर्मचारीहरू बताउँछन् । उद्योगका मजदुर तथा कर्मचारीहरू १६ महिनादेखि तलब–भत्ता नपाएको भन्दै आन्दोलनमा उत्रिएका छन् । उद्योग प्रशासनका अनुसार हाल उद्योग माथि पाँच अर्ब २९ करोड २४ लाख १३ हजार २८२ रुपैयाँ बढी दायित्व छ ।

सम्बन्धित समाचार

कर्णालीका ४६ स्थानीय तहमा मौसम मापन केन्द्र बञ्जीजम्पप्रति भारतीय पर्यटकको आकर्षण बढ्दो अर्घाखाँचीका वनक्षेत्रमा रिचार्ज पोखरी निर्माण राप्ती तटीय क्षेत्रका नागरिकलाई नदी तर्न डुङ्गाकै भर जग्गा खोजीमै अड्कियो बेनीको ‘ल्याण्डफिल साइट’ गण्डकी प्रदेशमा सर्पदंशका विरामी वृद्धि वन्यजन्तुका लागि भुल्के छोक्ला सामुदायिक वनमा पोखरी निर्माण