काठमाडौँ । मदन पुरस्कार गुठीले मदन पुरस्कार २०८२ का लागि अन्तिम प्रतिस्पर्धामा रहेका उत्कृष्ट १० पुस्तकको सूची सार्वजनिक गरेको छ।

गुठीका अध्यक्ष कुन्द दीक्षितले सोमबार जारी गरेको विज्ञप्तिअनुसार यस वर्ष पुरस्कारका लागि प्राप्त २९८ पुस्तकको मूल्यांकनपछि उत्कृष्ट मानिएका १० कृति छनोट गरिएको हो। यही सूचीबाट एक कृतिलाई मदन पुरस्कार २०८२ प्रदान गरिनेछ।

श्रेष्ठ सूचीमा केशवराज ज्ञवालीको अज्ञात, केशव दाहालको इथा, ललित विष्टको उत्कर्ष, रोशनकुमार झाको नेपालमण्डलसँग जोडिएको सिम्रौनगढको इतिहास तथा वीणा जोशी (राजभण्डारी) को नेवार समुदायका परम्परागत मुकुन्डोनाच समावेश छन्।

यस्तै, उमा सुवेदीको परिधि, सीमा आभासको महायुग, श्रवण मुकारुङको सलह, डा. नवराज केसीको स्वस्पर्श र नदीशको हिउँद पनि उत्कृष्ट १० कृतिको सूचीमा परेका छन्।

मदन पुरस्कारको स्थापना वि.सं. २०१२ मा भएको हो भने यसको पहिलो वितरण वि.सं. २०१३ मा गरिएको थियो। प्रारम्भिक वर्षमा सत्यमोहन जोशीको हाम्रो लोक संस्कृति, चित्तरञ्जन नेपालीको जनरल भीमसेन थापा र तत्कालीन नेपाल तथा बलराम जोशीको अधिकविभव स्थिरविद्युत् उत्पादक ले क्रमशः गद्य, सामाजिक शास्त्र र विज्ञान विधामा पुरस्कार प्राप्त गरेका थिए।

गुठीले वि. सं. २०७२ देखि प्रत्येक वर्ष प्राप्त पुस्तकहरूमध्ये अधिकतम १० उत्कृष्ट कृतिको श्रेष्ठ सूची सार्वजनिक गर्ने अभ्यास अवलम्बन गर्दै आएको छ। छनोट प्रक्रियामा पुस्तकभित्र समावेश अप्रकाशित सामग्रीलाई मुख्य मूल्यांकन आधारका रूपमा लिइने गुठीले जनाएको छ। वि. सं. २०७५ यता मदन पुरस्कारको राशि चार लाख रुपैयाँ कायम छ। यस वर्षको उत्कृष्ट कृतिको अन्तिम घोषणा भने गुठीले आगामी चरणमा गर्नेछ।

सम्बन्धित समाचार

चिकित्सा शिक्षा आयोगमा डा.खत्री नियुक्त होल्डिङ सेन्टरमा बाढी पस्दा सुकुम्वासीको बिचल्ली मुग्लिन-नारायणगढ सडकखण्डमा सवारीसाधन चलाउन रोक भुटानी शरणार्थी प्रकरणः पूर्वमन्त्री रायमाझीलाई ४ वर्ष, खाँणलाई २ वर्ष कैद सजाय राति १० बजेपछि नारायणगढ–मुग्लिन सडकमा सवारी आवागमन बन्द हेटौँडाबाट जाने सबै मार्गमा यातायात सेवा सञ्चालन बाटो खुलाउने प्रयास जारी, पृथ्वी राजमार्गमा कहिले चल्छ सवारी ?