धनगढी । चिकित्सा शिक्षा सुधारका अभियन्ता डा. गोविन्द केसीले आज (बिहीबार) दिउँसो ३ बजेदेखि धनगढीमा आमरण अनशन सुरु गर्ने भएका छन् । बुधबार धनगढी पुगेका केसीले धनगढी–१ स्थित कृष्ण मन्दिरको धर्मशालामा अनशन बस्ने कार्यक्रम तय भएको उनका सहयोगी डा. अमृत जैशीले जानकारी दिएका छन् । अनशन सुरु गर्नुअघि पत्रकार सम्मेलनमार्फत आन्दोलनका उद्देश्य सार्वजनिक गरिनेछ ।

यसपटकको अनशनलाई लिएर सुदूरपश्चिममा भने बहस चुलिएको छ । गेटास्थित शहीद दशरथ चन्द स्वास्थ्य विज्ञान विश्वविद्यालय सञ्चालनको प्रक्रिया अघि बढिरहेका बेला डा. केसीले त्यससम्बन्धी ऐन र नियुक्तिमाथि प्रश्न उठाएपछि सामाजिक सञ्जालमा समर्थन र विरोध दुवै प्रकारका प्रतिक्रिया देखिएका छन् ।

डा. केसीले गेटा मेडिकल विश्वविद्यालयसम्बन्धी ऐन हतारमा ल्याइएको र यसले सीमित स्वार्थको सेवा गर्ने दाबी गरेका छन् । उनले नयाँ विश्वविद्यालय स्थापना गर्नुको सट्टा त्रिभुवन विश्वविद्यालय चिकित्सा शास्त्र अध्ययन संस्थान वा बीपी कोइराला स्वास्थ्य विज्ञान प्रतिष्ठानलाई नै मेडिकल विश्वविद्यालयका रूपमा विकास गर्नुपर्ने धारणा सार्वजनिक गरेका छन् । साथै, हाल नियुक्त पदाधिकारीहरूको राजीनामा पनि माग गरेका छन् ।

यता, सुदूरपश्चिमका केही सर्वसाधारण र सामाजिक सञ्जाल प्रयोगकर्ताले भने गेटा मेडिकल विश्वविद्यालय सञ्चालन हुनुपर्ने पक्षमा धारणा राख्दै डा. केसीको आन्दोलनप्रति असहमति जनाएका छन् । फेसबुक प्रयोगकर्ता हिक्मत मल्ल, प्रेम भाट, डम्मरा थापा रावल, माधव पन्त, नृप विष्ट, हरिवोधन जोशीललगायतले सामाजिक सञ्जालमार्फत आफ्नो असन्तुष्टि व्यक्त गरेका छन् ।

गेटा मेडिकल विश्वविद्यालयको विषयलाई लिएर सामाजिक सञ्जालमा बहस तीव्र बन्दै गएको छ । आन्दोलन सुरु भएसँगै यस’bout थप राजनीतिक तथा सामाजिक प्रतिक्रिया आउने अपेक्षा गरिएको छ ।

सम्बन्धित समाचार

कञ्चनपुरमा ७१ जना फरार कैदीबन्दी पक्राउ च्याउ खोज्न जंगल गएका १४ महिला बेपत्ता पौडेलसहित १८ जनालाई भ्रष्टाचार मुद्दामा सफाइ बझाङमा जिप दुर्घटना हुँदा ३ जनाको मृत्यु, ५ जना गम्भीर घाइते नेपाल दूरसञ्चार प्राधिकरणको अध्यक्षमा अर्जुन घिमिरे जमुनाह नाकाबाट स्रोत नखुलेको पाँच लाख बरामद बुधबारदेखि भरी सिलिण्डर ग्यास पाइने सामाजिक विकास कार्यालय कैलालीको वार्षिक प्रगति समीक्षा सम्पन्न