काठमाडौं । आम जनता पार्टी (आजपा) निकटको आम महिला मोर्चाले बाराका सुरक्षा प्रमुखहरुलाई निलम्बन गरेर गरिमा चौधरी प्रकरणमा अनुसन्धान गर्नुपर्ने माग गरेको छ । मोर्चाले सुरक्षा निकायका प्रमुख सिडियो, प्रहरी प्रमुखमाथि पनि अनुसन्धान गरी कारवाही गर्नुपर्ने माग गरेको छ ।

मोर्चाका इन्चार्च रन्जुकुमारी साहले आज प्रेस विज्ञप्ति जारी जारी यस्तो माग गरेकी हुन् । बाराको जीतपुरसिमरा उपमहानगरपालिका–१ भक्तिनगर टोलकी ३ बर्षीया बालिका गरिमा चौधरीलाई बलात्कारपछि गरिएको निर्मम र अमानवीय हत्या प्रकरणमा बाराका सुरक्षा निकाय पनि दोषी रहेको मोर्चाको ठहर छ ।

तीन दिनसम्म अबोध बच्चा बेपता रहँदा समेत स्थानीय सुरक्षा निकाय कानमा तेल हालेर बस्नु र समयमै खोजी कार्यमा तदारुकता नदेखाएको जनाउँदै मोर्चाले बाराका सुरक्षा निकाय प्रमुखलाई तत्काल निलम्बन गरी गरिमा चौधरी प्रकरणको अनुसन्धान गर्नुपर्ने माग गरेको छ ।

‘तीन दिनसम्म अबोध बच्चा बेपत्ता रहँदा समेत स्थानीय सुरक्षा निकाय कानमा तेल हालेर बस्नु र समयमै खोजी कार्यमा तदारुकता नदेखाउनु अत्यन्तै आश्चर्यजनक, लज्जास्पद र गैरजिम्मेवारपूर्ण विषय हो । सुरक्षा संयन्त्रको यस्तै फितलो उपस्थिति र उदासीनताका कारण आज एउटी मासूम बालिकाले अकालमा ज्यान गुमाउनुपरेको छ । यस लापर्बाहीको समेत हामी घोर भत्र्सना गर्दछौँ,’ मोर्चाका इन्चार्ज साहले जारी गरेको विज्ञप्तिमा उल्लेख गरिएको छ ।

गरिमा चौधरीलाई बलात्कारपछि गरिएको निर्मम र अमानवीय हत्याको खबरले आम महिला मोर्चा स्तब्ध, मर्माहत र अत्यन्तै आक्रोशित व्यक्त गरेको छ । ‘यो क्रूर र दानवीय कृत्य केवल एक पीडित परिवारमाथिको बज्रपात मात्र नभएर सम्पूर्ण समाजको सुरक्षा, कानुनी राज्य र मानवतामाथिको गम्भीर प्रहार हो,’ विज्ञप्तिमा उल्लेख गरिएको छ ।

कुनै पनि सभ्य समाजमा बालबालिकाहरू सबैभन्दा सुरक्षित हुनुपर्नेमा, चकलेटको प्रलोभन देखाएर यसरी एउटा मासूम जीवनमाथि खेलबाड गरिनु र हत्या हुनुले राज्यको शान्ति सुरक्षाको अवस्था र नागरिक चेतनामाथि गम्भीर प्रश्न खडा गरेको मोर्चाले जनाएको छ ।

‘मृतक बालिका गरिमा चौधरीको आत्माले तब मात्र शान्ति पाउनेछ, जब यो जघन्य अपराधमा संलग्न क्रूर अपराधीहरूले हदैसम्मको कानुनी सजाय पाउनेछन् । यस सन्दर्भमा हामी राज्यका सम्बन्धित निकाय, प्रहरी प्रशासन र न्यायिक प्रणालीसँग जोडदार माग गर्दछौँ,’ मोर्चाका इन्चार्ज साहले माग गरेकी छन् ।

सम्बन्धित समाचार

गढन्ता खोलाको बाढीले बगाउँदा एक जनाको मृत्यु न्याय खोज्दै तेतरी खातुन मधेस प्रदेशमा ट्रान्सफर्मर चोरीका घटना बढे भुक्तानीको चक्करले घण्टाघरका घडी धर्म छोड्दै बन्दीपुरमा ट्याक्टर दुर्घटना हुँदा १५ जना घाइते सप्तरीमा हराएका २६ मध्ये २० जना भेटिए अमरिश १३ वर्षदेखि भारतमा वेपत्ता उपभोक्ता कानून ल्याउन प्रदेश सरकारलाई नैतिक दवाव