धनगढी । रसुवाको भोटेकोशी नदीमा आएको बाढीमा परी बेपत्ता भएकाहरूको पहिचानका लागि सुदूरपश्चिममा आफन्तको डीएनए परीक्षण गर्न नमूना संकलन सुरु गरिएको छ ।

बाढीपछि लामो समयसम्म सम्पर्कमा नआएका व्यक्तिको पहिचानका लागि आफन्तको डीएनए नमूना संकलन थालिएको सुदूरपश्चिम प्रदेश प्रहरी कार्यालयले जनाएको छ ।

प्रदेश प्रहरी कार्यालयका प्रवक्ता प्रहरी वरिष्ठ उपरीक्षक पदमबहादुर विष्टका अनुसार हालसम्म सुदूरपश्चिममा १४ जनाको डीएनए परीक्षणका लागि नमूना संकलन गरिएको छ । कञ्चनपुर र कैलालीका ६–६ तथा डडेल्धुराका दुई जनाको नमूना संकलन गरिएको उनले जानकारी दिए ।

गत १० भदौमा रसुवाको भोटेकोशी नदीमा आएको बाढीमा परी सुदूरपश्चिमका २०९ जना बेपत्ता भएका थिए । तीमध्ये ५९ जना सम्पर्कमा आइसकेका छन् ।

प्रवक्ता विष्टका अनुसार कैलालीका ४६, कञ्चनपुरका १०, बाजुराका दुई र डडेल्धुराका एक जना सम्पर्कमा आएका छन् ।

अझै सुदूरपश्चिमका विभिन्न जिल्लाका १५० जना सम्पर्कविहीन रहेको प्रहरीले जनाएको छ । प्रहरीका अनुसार सम्पर्कविहीन हुनेमा कञ्चनपुरका ३६, डडेल्धुरा र बाजुराका १६–१६, बैतडीका आठ, दार्चुलाका चार तथा डोटी, बझाङ र अछामका दुई–दुई जना रहेका छन् ।

सम्बन्धित समाचार

पाँच वर्षमै जीर्ण बन्यो राउटे वस्तिको सोलार लिफ्ट सिँचाइ योजना बाढीमा सुदूरपश्चिमका १५० जना अझै बेपत्ता कमजोर बन्यो अमेरिकी डलर, अन्य मुद्राको अवस्था कस्तो छ ? बाढी पूर्वानुमान महाशाखाको स्पष्टोक्ति : ‘थप ठूलो बाढी आउने हल्लामा सत्यता छैन’ बाढी प्रभावित क्षेत्रमा बत्तीको जोहो गर्दै ऊर्जा मन्त्रालय घटनास्थलमा क्षतिको अवस्था गम्भीर: एनआरएनए संस्थापक डा. महतो मोबाइलमा फोटो, शवगृहमा पर्खाइ ! भोटेकोशी बाढीः मधेस प्रदेशका हराइरहेका ३० जना सम्पर्कमा