काठमाडौं । नेपालमा बाल क्यान्सर उपचारलाई प्रभावकारी बनाउन राष्ट्रियस्तरमा समन्वय बढाउँदै उपचारमा पहुँच विस्तार गर्नुपर्नेमा सरोकारवालाले जोड दिएका छन्।

काठमाडौंमा सेप्टेम्बर २९ मा आयोजित ‘राष्ट्रिय बाल क्यान्सर उपचार तथा सरोकारवाला सहभागिता गोष्ठी’ले बाल क्यान्सर उपचारका लागि एकीकृत राष्ट्रिय दृष्टिकोण आवश्यक रहेको निष्कर्ष निकालेको हो।

विश्व बाल क्यान्सर, रमेश गुप्ता मेमोरियल ट्रस्ट र सम्बन्धित साझेदार संस्थाको संयुक्त आयोजनामा भएको गोष्ठीमा सरकारका प्रतिनिधि, अस्पताल, स्वास्थ्यकर्मी, पेशागत संघसंस्था, गैरसरकारी संस्था, अभिभावक, क्यान्सरबाट निको भएका व्यक्ति तथा अन्तर्राष्ट्रिय साझेदार संस्थाका प्रतिनिधिको सहभागिता थियो।

गोष्ठीमा बाल क्यान्सरको प्रारम्भिक पहिचान, समयमै उपचारका लागि पठाउने व्यवस्था, उपचारमा समान पहुँच, औषधि तथा परीक्षणको उपलब्धता, पोषण, मनोसामाजिक सेवा, परिवार सहयोग र उपचारपछिको सेवासहितका विषयमा छलफल भएको थियो।

सहभागीहरूले बाल क्यान्सरलाई राष्ट्रिय स्वास्थ्य प्राथमिकतामा थप महत्व दिनुपर्ने बताएका थिए। स्पष्ट जिम्मेवारी, मापनयोग्य लक्ष्य र निश्चित समयसीमासहितको राष्ट्रिय बाल क्यान्सर कार्ययोजना बनाउनुपर्नेमा पनि जोड दिइएको थियो।

समुदायस्तरमा जनचेतना बढाउने, प्राथमिक स्वास्थ्य सेवामा कार्यरत स्वास्थ्यकर्मीको क्षमता विकास गर्ने, बिरामीलाई समयमै विशेषज्ञ स्वास्थ्य संस्थामा पठाउने प्रणाली सुधार गर्ने तथा निदान र विशेषज्ञ उपचार सेवा विस्तार गर्नुपर्ने सुझाव दिइएको छ।

त्यस्तै, बाल क्यान्सर उपचार केन्द्रहरूको राष्ट्रियस्तरमा मूल्यांकन गरी जनशक्ति, परीक्षण सेवा, औषधिको उपलब्धता, उपचार, बिरामी सुरक्षा, सहायक उपचार तथा मनोसामाजिक सेवाको अवस्था समीक्षा गर्नुपर्नेमा जोड दिइएको छ।

बालबालिका र परिवारलाई केन्द्रमा राखेर गुणस्तरीय उपचार सुनिश्चित गर्न आवश्यक औषधि तथा रगतजन्य सामग्रीको नियमित उपलब्धता, नर्सिङ जनशक्तिको क्षमता विकास, किमोथेरापी र संक्रमण नियन्त्रणसम्बन्धी मापदण्डको प्रभावकारी कार्यान्वयन तथा पोषण र मानसिक स्वास्थ्यसम्बन्धी सहयोग बढाउनुपर्ने सुझाव दिइएको छ।

गोष्ठीले बाल क्यान्सरसम्बन्धी राष्ट्रिय तथ्यांक प्रणालीलाई थप व्यवस्थित बनाउनुपर्ने आवश्यकता पनि औंल्याएको छ। रोग पहिचानमा हुने ढिलाइ, उपचार बीचमै छाड्ने अवस्था, उपचार पूरा गर्ने दर, रोग पुनः देखिने अवस्था, बाँच्ने दर र जीवनस्तरजस्ता सूचकको नियमित अभिलेख र मूल्यांकन गर्न भरपर्दो तथ्यांक प्रणाली आवश्यक रहेको सहभागीहरूको निष्कर्ष थियो।

सरकार, अस्पताल, पेशागत संघसंस्था, नागरिक समाज, अभिभावक, क्यान्सरबाट निको भएका व्यक्ति तथा अन्तर्राष्ट्रिय साझेदारको सहभागितामा राष्ट्रिय बाल क्यान्सर समन्वय संयन्त्र स्थापना वा विद्यमान संयन्त्रलाई सुदृढ गर्न पनि गोष्ठीले सिफारिस गरेको छ। उक्त संयन्त्रमार्फत बाल क्यान्सर उपचारमा भएको प्रगतिको नियमित अनुगमन, वार्षिक समीक्षा र जिम्मेवारी सुनिश्चित गर्नुपर्ने सुझाव दिइएको छ।

सम्बन्धित समाचार

प्रसुति हिंसा न्यूनीकरणकालागि कानुन निर्माणमा जोड जनस्वास्थ्य कार्यालयको मूल्यांकनमा किस्ट शिक्षण अस्पताल प्रथम बागमती प्रदेश सरकारले भन्यो : ९ असोजदेखि ११ असोजसम्म भारी वर्षाको सम्भावना छ, सतर्कता अपनाउनु संविधानविद् विपिन अधिकारी भन्छन्- चोलेन्द्रशमशेरलाई पक्राउ गर्नुको कारण गृहमन्त्रीले जवाफ दिनुपर्छ पूर्वप्रधानन्यायाधीशलाई नियन्त्रणमा लिनु राज्यको गम्भीर त्रुटि : प्रभु साह एसएसपी खड्का पुगे आयोग, गृहमन्त्री र आइजीपीलाई पनि बोलाइने नारायणी किनार कहर : नगरपालिका बनाउँछ, नदी बगाउँछ काठमाडौं क्षेत्र नं. २ मा १५औँ महाधिवेशनको सन्देशसहित सामूहिक शपथ ग्रहण सम्पन्न