हरियो तरकारीमा बिचौलिया

कोरोना महामारीसँगै महँगिँदै गएको तरकारीको मूल्य वर्षा र बाढीको बहानामा झन् बढाइएको छ । प्राकृतिक विपद्सँगै बिचौलियाले हरियो तरकारी बजार आफ्नो हातमा लिएका छन् । पूर्व–पश्चिम राजमार्ग तथा नारायणघाट–मुग्लिङ सडकखण्ड पहिराले केही घण्टा छेकिनेबित्तिकै तरकारीको मूल्य एकै दिनमा दोब्बर बनाइन्छ । किसानबाट प्रतिकिलो १५–२० रुपैयाँमा किनिएको तरकारी चारपाँच गुणा फरक गरेर बिक्री गरिन्छ । त्यसो त बिचौलियाले हरेक वर्ष बाढीपहिराको बहानामा हरियो तरकारीको मूल्य दोब्बर तेब्बर बढाएर उपभोक्तालाई निचोरिरहेका हुन्छन् ।

सरकारको सम्बन्धित निकाय काठमाडौंमा भए पनि तरकारी बजारसम्म आएर अनुगमन र निरीक्षण गर्न उसलाई मुग्लिङमा गएको पहिरोले छेकेको हुन्छ

केही दिन वर्षा हुने सूचना पाउनेबित्तिकै केही दिनसम्म नबिग्रने तरकारी स्टोर गर्न थालिन्छ । अहिले काठमाडौं आउने बाटोघाटो त्यति बिग्रिएको छैन । तथापि काठमाडौंका तरकारी बजारमा मूल्य अकासिएको छ । एक एक किलोका हिसाबले खुद्रा तरकारी बिक्री गर्दा त्यसै त महँगो मूल्यमा बिक्री गरिरहेका छन्, त्यसमा झन् मूल्य नै दोब्बर तेब्बर बनाइएपछि उपभोक्ता चरम मारमा परिरहेका छन् । निकै आश्चर्यको कुरा छ– सरकारको सम्बन्धित निकाय काठमाडौंमा भए पनि तरकारी बजारसम्म आएर अनुगमन र निरीक्षण गर्न उसलाई मुग्लिङमा गएको पहिरोले छेकेको हुन्छ । वर्षे भेलमा उर्लिरहेका त्रिशूली, नारायणी, कोसी र कर्णालीका समाचारले उसको बाटो छेकिरहेको हुन्छ । यति नै बेला बिचौलियाको मनपरी मूल्य निर्धारण नै सरकारी मापदण्ड बनिरहेको हुन्छ । उनीहरूको सिधा र बनिबनाउ जवाफ हुन्छ– बाढीका कारणले मूल्य बढेको हो, केही दिनमा घट्छ । यसको अर्थ हुन्छ, उपभोक्ताहरूले धैर्यधारण गर्नुको विकल्प छैन ।

मूल्य निर्धारणको मापदण्ड अविरल वर्षा, पहिरो, भेलबाढी आदि हुने गर्दछ । किनकि यो सबैका लागि स्वाभाविक हुन्छ । कुरो हो पनि, काठमाडौं उपत्यकामा तरकारीको आपूर्ति बाहिरबाट हुन्छ । विशेषतः छिमेकी देश भारतबाट आयात गरिन्छ । बजार अर्थशास्त्री सिद्धान्तका कुरा गर्छन्, बजारमा आपूर्ति कम हुँदा तरकारीको मूल्य स्वाभाविकै रूपमा बढ्छ ।
त्यस्तै, अनुगमन र निरीक्षणकर्ताहरूको सोचमा पनि यही बनीबनाउ बिर्को लागेको हुन्छ । काठमाडौं उपत्यकामा दैनिक १३ सय मेट्रिक टन तरकारी आउनुपर्छ, नआउँदा मूल्य वृद्धि हुन्छ । अहिले कम आएकाले मूल्य बढेको भन्ने जवाफको न त प्रतिप्रश्न छ, न त कुनै औषधीय उपाय । सबैभन्दा ठूलो कुरा छ, धैर्यधारण । कृषिप्रधान देश नेपालमा वर्षा लाग्दा तरकारीको मूल्य अकासिने गर्छ । जनता जान्न चाहन्छन्– बिचौलिया को हुन् भनेर । तर, यो असम्भव बनाइएको छ ।

राज्यसंयन्त्रका हरेक अंगमा कब्जा जमाउँदै आइरहेका बिचौलियाको कुकृत्य अब अन्त्य हुनैपर्छ । भ्रष्टाचारमा शून्य सहनशीलताको नीति लिएको वर्तमान सरकारले यो विषयलाई संवेदनशील रूपमा लिएर सशक्त कारबाही प्रक्रिया अगाडि बढाउनुपर्छ । अहिले पनि वाणिज्य विभाग, जिल्ला प्रशासन कार्यालयको टोलीले छिटोभन्दा छिटो तरकारी बजार तथा अन्य खाद्य विक्रेतामाथि सशक्त अनुगमन गर्नुपर्छ । वास्तविक कृषक र उपभोक्ता शोषित हुने र पीडित हुने अवस्था अन्त्य गर्नुपर्छ ।

तपाइको प्रतिक्रिया
(Visited 240 times, 1 visits today)

Ads Space Available

epaper

भर्खरै

‘अर्थतन्त्रमा दीर्घकालीन असर’

कुरी-कुरी

राजधानी राष्ट्रिय दैनिक:कुरी-कुरी – असोज ८, २०८०
राजधानी राष्ट्रिय दैनिक:कुरी-कुरी – असोज ८, २०८०
धनगढीमा स्वतन्त्र उम्मेदवार हमालको अग्रता कायमै