राजधानी समाचारदाता
काठमाडौं । हास्यव्यंग्य अभिनेता हरिवंश आचार्यले एक समय गाईजात्रा र प्यारोडी गीत निकालेरै त्यसको आम्दानीले घर बनाएका थिए । केही वर्षयता गाईजात्रा गीत निकाल्न नभ्याएका हरिवंशले यसपटक भने गाईजात्रे गीत दर्शकमाझ ल्याएका छन् ।
नजिकिँदै गरेको यो वर्षको गाईजात्रालाई मध्यनजर राख्दै नयाँ गाईजात्रे गीत उनले बिहीबार रिलिज गरेका हुन् । उनले ‘तिमी केको जान्ने…’ गाईजात्रे गीत सार्वजनिक गरेका हुन् ।
हरिवंश आचार्यको शब्द, संगीत र स्वरमा यो गीत तयार भएको छ । उनले गीतको भिडियो सार्वजनिक गरेका छन् । गीतमा समसामयिक समस्यासँगै राजनीतिक व्यंग्य पनि छ । यो गीतमा भूपालमान सिंहको एरेन्ज रहेको छ ।
यो गीतको भिडियो सागरराज शर्माको निर्देशनमा तयार भएको छ । गीतको भावलाई भिडियोमा राम्ररी उतारिएको छ । गीतको भिडियोमा हरिवंश आचार्य आफैं केन्द्रीय पात्रका रूपमा छन् । भिडियोमा हरिवंशसँगै, शशिकुमार खड्का, किरण तुलाधर, विकास भट्टराई, सुष्मा कार्की, धनराम मुस्कान, अनिल जिसी (बुलेट), सम्राट घिमिरे, दीप शेर्पाली, सुवाश महत, शंकर विसीलगायतको अभिनय छ ।
शशिकिरणको अवधारणामा भिडियो तयार भएको हो । हरि हुमागाईंको छायांकन रहेको गीतको भिडियो सुशील न्यौपानेको सम्पादन छ । गीतलाई पंकज अधिकारीले अंग्रेजी अनुवाद गरेका छन् । गीतको भिडियोमा विक्रम थापाको शृंगार रहेको छ । अहिलेको अवस्थामा खुलेर गाईजात्रा कार्यक्रम देखाउन नसकिने भएपछि आचार्यले गाईजात्रा गीत ल्याएका हुन् ।
