मुम्बई । भारतमा बहुबलीजस्तो व्यावसायिक सफल फिल्म बनाएका एसएस राजामौलीको नयाँ फिल्म आरआरआर प्रदर्शनको तयारीमा छ । यो फिल्म अहिलेसम्म ५ भाषामा तयार हुँदै छ । तर, अब यो फिल्म अरू पाँच विदेशी भाषामा पनि तयार हुने भएको छ ।
फिल्मको अन्तर्राष्टिय वितरण जिम्मा लिएको कम्पनीले विदेशमा अरू पाँच भाषामा पनि रिलिज गर्ने भएको छ । यो फिल्म भारतका लागि हिन्दी, तेलुगु, तमिल, मलयालम र कन्नड भाषामा निर्माण भइरहेको थियो ।
आरआरआर विदेशमा रिलिजका लागि अंग्रेजी, स्पेनिस, कोरियन, टर्किस र पुर्तुगिस भाषामा पनि तयार हुने भएको छ । विदेशी भाषामा रिलिज माग आएपछि निर्माण पक्षले थप पाँच भाषामा पनि तयार गर्न लागेको हो । फिल्मको ओटीटी रिलिजका लागि डिजिटल राइट्स नेटफिक्सले खरिद गरेको छ ।
यो फिल्म अहिलेसम्म उत्तर भारतका लागि थिएटर तथा सेटेलाइट राइट र ओटीटी राइट गरेर ४ सय ५० करोड भारतीय रुपैयाँमा बिक्री भइसकेको छ । सन २०२१ को भारतको सबैभन्दा महँगो र आशा गरिएको फिल्मका रूपमा आरआरआरलाई लिइएको छ ।
एक्सन प्रधान यो फिल्ममा साउथ इन्डियन स्टार रामचरण, जुनियर अनटीआरसँगै बलिउडबाट अजय देवगन, आलिया भट्टलगायतका कलाकार रहेका छन् ।
