इटहरी । टिपरको ठक्करबाट इटहरीका एकसहित दुईजनाको मृत्यु भएको छ भने एकजना गम्भीर घाइते भएका छन् । पूर्व क्षेत्रीय ट्राफिक प्रहरी कार्यालय इटहरीका प्रमुख प्रहरी उपरीक्षक (एसपी) सञ्जीव शर्माका अनुसार मोरङको सुन्दरहरैँचा ९ स्थित पूर्व पश्चिम राजमार्गमा पश्चिमबाट पूर्वतर्फ आउँदै गरेको तत्काल अल्फाबेट नम्बर नखुलेको टिपरले पश्चिमतर्फ जाँदै गरेको को ३६ प ५९७९ नं. को मोटरसाइकलाई ठक्कर दिई दुर्घटना हुँदा दुईजनाको मृत्यु भएको हो ।
मृत्यु हुनेमा इटहरी उपमहानगरपालिका ४ बस्ने अन्दाजी ३५ वर्षीय दिपु साह रहेका छन् । त्यस्तै, धनकुटा नगरपालिका ७ पाख्रीबास बस्ने अन्दाजी ५० वर्षीय कृष्णबहादुर थापाको मृत्यु भएको प्रहरीले जनाएको छ । थापा नेपाली कांग्रेस धनकुटाका सचिव समेत रहेको खुलेको छ ।
दुवै जनाको उपचारको क्रममा धरानस्थित वीपी कोइराला स्वास्थ्य विज्ञान प्रतिष्ठानमा मृत्यु भएको एसपी शर्माले जानकारी दिए ।
त्यस्तै, पाख्रीबासकै २७ वर्षीय भीमबहादुर थापा गम्भीर घाइते एका छन् । उनको वीपी प्रतिष्ठानमा उपचार भइरहेको छ । बिपरीत दिशा तर्फ जाँदै गरेको को २९ प ९५५० नं. को मोटरसाइकल समेत अनियन्त्रित भई दुर्घटना भएको थियो । दुवै मोटरसाइकल प्रहरीको नियन्त्रणमा छन् भने दुर्घटना गराउने टिपरको खोजी कार्य भइरहेको प्रहरीले जनाएको छ ।
