इटहरी । अहिले विश्वव्यापी रुपमा फैलिएको कोरोना भाइरसका कारण इटहरीमा खाना पकाउँने ग्याँस सिलिन्डर र मास्कको अभाव भएको सर्वसाधारणको गुनासो बढ्दो छ । यहि क्रममा सर्वसाधारणको मागलाई मध्यनजर गर्दै इटहरी उपमहानगरपालिकाले बजार अनुगमन गरेको छ ।
इटहरीकी उपमेयर लक्ष्मी गौतमको नेतृत्वमा वजार अनुगमन गरिएको हो । सात वटा ग्याँस डिलरको अनुगमन गर्दा २ वटामा ग्याँस सकिएको, एउटामा पसल वाहिर खाली तर भित्र भरिएका सिलिण्डर राखेको र अरु चार वटामा वेचविखन भइरहेको अनुमगन टोलीले जनाएको छ । डिलरहरुको माग अनुसार उद्योगले नै ग्याँस नपठाउने गरेको व्यापारीहरुले गुनासो समेत गरेका छन् । उपभोक्ताहरुले संचित गरेर राख्न एक भन्दा धेरै ग्याँस सिलिण्डर लिन थालेपछि पनि अभाव जस्तो देखिएको व्यापारीको भनाई रहेको छ ।
त्यस्तै, तीन वटा औषधी पसल अनुगमन गर्दा मास्कको अभाव देखिएको छ । तीनवटै औषधी पसलमा पूर्ण रुपमा मास्क नरहेको अनुगमन टोलीले जनाएको छ ।
उपमेयर लक्ष्मी गौतमले कोरोनाबाट बच्नका लागि उपमहानगर आफैँले मास्क वितरण गर्ने भन्ने बिषयमा पनि छलफल गरेको बताईन् । उपमहानगरले वजार अनुगमनलाई तीब्रता दिने उनको भनाई रहेको थियो ।
