काठमाडौं । नेकपा(एमाले)का नेता घनश्याम भुसालले नेपालका कम्युनिष्ट पार्टीहरुका बिचमा एकता गर्नुपर्ने बताएका छन् ।
मंगलवार काठमाडौंमा सञ्चारकर्मीहरुसँग कुराकानी गर्दै नेता भुसालले नेपालका कम्युनिष्ट पार्टीहरुबीचमा सैद्धान्तिक र वैचारिक मतभिन्नता नरहेकाले पार्टी एकता गर्नुपर्ने बताएका हुन् । उनले विशेषगरी विगतमा नेपाल कम्युनिष्ट पार्टी(नेकपा)बाट विभाजन भएको नेकपा(एमाले), नेकपा(माओवादी केन्द्र) र नेकपा(एकीकृत समाजवादी)बिचमा एकता हुनुपर्नेमा जोड दिए ।
नेता भुसालले कम्युनिष्ट पार्टीलाई एकताबद्ध गर्न सके देशको लोकतन्त्र बलियो हुने पनि बताए । उनले विगतमा पार्टी विभाजन हुनुमा सबैको भुमिका छ भनेर आ—आफुले आत्मआलोचना गरेमा तत्कालका लागि स्थानीय तह निर्वाचनमा वाम गठबन्धन गर्न सकिने बताए । आसन्न स्थानिय तह निर्वाचनमा वाम गठबन्धन गरेर पार्टी एकताका लागि आधार तयार गर्नुपर्नेमा उनले जोड दिए ।
कम्युनिष्ट आन्दोलनलाई एकतावद्ध पार्न, नेपालको लोकतान्त्रिक स्थिरतालाई बलियो बनाउन र हाम्रो लोकतन्त्रलाई बलियो बनाउन पनि बाम एकता आवश्यकता भएको उनको भनाई थियो ।
नेता भुसालले नेताहरुका स्वार्थमा आधारित एकता टिक्दैन भन्ने कुरा बिगतको अनुभवहरुबाट बुझिसकिएको भन्दै आगामी एकता भने नेताहरुको नीजि स्वार्थमा टेकेर गर्नु नहुने बताए ।