इटहरी । इटहरीमा बम बिस्फोट भएको छ । इटहरी २ स्थित नवजागृति टोलका अमित श्रेष्ठको घरको तल्लो तलामा सोमबार राति साढे १० बजे बम बिस्फोट भएको हो ।
जिल्ला प्रहरी कार्यालय सुनसरीका प्रहरी उपरीक्षक (एसपी) सञ्जयसिंह थापाका अनुसार बम बिस्फोटमा दुईजना घाइते भएका छन् । उनका अनुसार कोठाभाडामा बस्दै आएका २२ वर्षीय रबिन थापा र २० दिनअघि उनकै कोठामा पाहुना आएका लमजुङका २३ वर्षीय शेरजंङ गुरुङ घाइते भएका हुन् । गुरुङले ल्याएको झोलामा बिस्फोटक पदार्थ रहेको प्रहरीको अनुमान छ ।
‘बिस्फोटको सम्बन्धमा प्रहरीले सुक्ष्म रुपमा अनुसन्धान गरिरहेको छ,’ एसपी थापाले राजधानीसँग भने, ‘घाइतेहरूको प्रहरीको निगरानीमा विराटनगरमा उपचार भइरहेको छ ।’ उनका अनुसार घाइतेहरू खतरामुक्त छन् ।
बिस्फोटको कारण घरको कोठाका सिसा फुटेको छ भने ढोका पनि भत्किएको छ । लमजुङबाट आएका गुरुङको भने आधिकारिक पहिचान नखुलेको अनुसन्धान भइरहेको एसपी थापाले बताए । प्रहरीका अनुसार बिस्फोट भएको बम सुतली बम भएको खुलेको छ । आफैँ घटनास्थल पुगेका एसपी थापा भन्छन्, ‘ठूलो र खतरानक बम नभएपनि डर, त्रास देखाउनलाई राखिएको बम हो, ठूलो बम भएको भए दुवैजनाको ज्यानै जान सक्थ्यो ।’
इलाका प्रहरी कार्यालय इटहरीका प्रहरी नायब उपरीक्षक (डीएसपी) खगेन्द्रबहादुर खड्का, जिल्ला प्रहरी कार्यालय सुनसरीका एसपी थापा लगायतका प्रहरी अधिकारीहरूले राति नै घटनास्थल पुगेर अनुसन्धानको प्रक्रिया अगाडि बढाएका थिए । ‘हामीले अनुसन्धान गरिरहेका छौँ, अनुसन्धानपछि मात्रै सबै कुरा बाहिर आउँछ,’ एसपी थापाले भने, ‘घटनास्थलबाट केही प्रचाहरू पनि रहेकाले अनुसन्धानमा थप मद्वत पुग्नेछ ।’ उनका अनुसार घटनास्थलबाट हिमाल सुरक्षा परिषद नेपालको दुईवटा पर्चा बरामद गरिएको छ । यस्तै, शंकास्पद एउटा झोला समेत प्रहरीले बरामद गरेर अनुसन्धानको लागि लगेको छ ।
पर्चामा कफनका पूर्वाञ्चल डिभिजन प्रमुख बृज किशोर ठाकुर र हिमाल सुरक्षा परिषदको केन्द्रिय अध्यक्ष अर्जुन नामबाट हस्ताक्षर भएको छ । राजसंस्था पुर्नस्थापनाको हुनुपर्ने तथा एमसीसी खारेज हुनुपर्ने बिषयहरु उक्त पर्चामा उल्लेख गरिएको छ ।
हिमाल सुरक्षा परिषद नेपालले गत फागुन १५ गते विज्ञप्ती निकाल्दै सशस्त्र युद्धको घोषणा गरेको थियो । सोही परिषदको नाममा झापाको बिर्तामोड र दमकमा बम आतङ्क सिर्जना गर्ने ९ जनालाई यसअघि झापा प्रहरीले पक्राउ गरिसकेको छ ।
