काठमाडौं । सरकारले सशस्त्र प्रहरी बलमा एउटा एआईजीको दरबन्दी थप गरेको छ । सरकारले कार्य तथा सीमा सुरक्षा विभागलाई फुटाएर एआईजीको संख्या तीन पुर्याएको हो । दरबन्दी थपको पत्र हिजो सोमबार मात्रै सशस्त्र प्रहरी महानिरीक्षकको सचिवालयमा आएको थियो ।
सशस्त्र प्रहरी महानिरीक्षक राजु अर्याल स्वदेशमा नभएको बेला सरकारले एआईजीको दरबन्दी थप गरेको हो । एआईजीको दरबन्दी थप गरिएको बेला महानिरीक्षक अर्याल अमेरिका थिए । उनी संयुक्त राष्ट संघको कार्यक्रममा सहभागी हुन अमेरिका गएका थिए । उनी अमेरिका भएको बेला २१ भदौको मन्त्रिपरिषद बैठकले एउटा एआईजीको दरबन्दी थप गर्ने निर्णय गरेको हो ।
सशस्त्र प्रहरीमा दुई ओटा एआईजीको दरबन्दी रहेकोमा संगठनको ओएण्डएमबिनै तीन ओटा पुर्याइएको हो । संगठनको ओएण्डएमबिनै सरकारले व्यक्तिलाई लक्षित गरेर दरबन्दी थप गरेको हो ।
सरकारले एआईजीको एउटा दरबन्दी थपे पनि सशस्त्र प्रहरी बल प्रधान कार्यालयले भने एआईजीको मात्रै दरबन्दी थपका लागि औपचारिकरुपमा गृह मन्त्रालयमा कुनै पत्र पठाएको थिएन । सशस्त्र प्रहरी महानिरीक्षक अर्याल एआईजीको मात्रै दरबन्दी थप्न नहुने पक्षमा थिए ।
स्रोतका अनुसार गृहमन्त्री बालकृष्ण खाँड र तत्कालीन गृहसचिव टेकनारायण पाण्डेको जोडबलमा एआईजीको दरबन्दी थप भएको हो । गृहसचिव पाण्डेलाई भने हिजोको मन्त्रिपरिषद बैठकले प्रधानमन्त्री तथा मन्त्रिपरिषदको कार्यालयमा सरुवा गरेको छ ।
स्रोतका अनुसार सशस्त्रका डीआईजी बंशिराज दाहाल अब एआईजी बन्ने छन् । उनलाई नै एआईजी बनाउन दरबन्दी थप गरिएको स्रोतको दाबी छ । दरबन्दी थप गर्ने सिलसिलामा आर्थिक चलखेल भएको पनि स्रोतको दाबी छ ।
स्रोतका अनुसार थप गरिएको एआईजी पदमा तुरुन्तै बढुवा प्रक्रिया थाल्न पनि दबाब बढाइएको छ । महानिरीक्षक अर्याल भने तत्कालै बढुवा गर्ने पक्षमा छैनन् । सशस्त्र प्रहरीमा ६ साउनदेखि २२ असोजसम्म कसैको पनि बढुवा गर्न सशस्त्र प्रहरी नियमावली २०७२ ले दिँदैन ।
राजधानी अनलाइनले केही दिनअघि नै सशस्त्र प्रहरी प्रधान कार्यालयको स्वीकृतिबेगर नै एआईजीको दरबन्दी थप गर्न लागिएको समाचार छापेको थियो ।
