काठमाडौं । माओवादी केन्द्रका अध्यक्ष पुष्पकमल दाहाल प्रचण्डलाई कांग्रेस सभापति शेर बहादुर देउवा र एमाले अध्यक्ष केपी शर्मा ओलीले टेलिफोन गरेर बधाई दिएका छन् ।
नेकपा विभाजनपछि संवाद विहिन अवस्थामा पुगेका ओली र प्रचण्डविच पहिलो टेलिफोन वाता हो । टेलिफोन संवादमा ओलीले प्रचण्डलाई आगामी दिनमा मिलेर जान आग्रह समेत गरे । ओलीसंग कुराकानी भए लगत्तै देउवाले फोन गरेर औपचारिक बधाई दिए । दुवैले बधाई साटासाट गरे ।
फेरि निर्णायक प्रचण्ड
पछिल्लो मत परिणाम अनुसार माओवादीविना कांग्रेस एमालेको सरकार सम्भव छैन । यदि कांग्रेस र एमाले मिले भने अन्य पार्टीको आवश्यकता पर्दैन । तर, कांग्रेस र एमाले मिलेर सरकार बनाउने सम्भावना असाध्यै कम छ । आजको टेलिफोन संवादले पनि संकेत गर्छ ‘कांग्रेस वा एमाले माओवादीको सहयोगमा सरकारमा जान्छ ।’ त्यो अवस्थामा प्रचण्डनै निर्णायक हुनेछन् ।
निर्वाचन परिणाम सार्वजनिक हुँदै गर्दा समाजवादीका अध्यक्ष माधवकुमार नेपाल, माओवादी महासचिव देव गुरुङलगायतले वाम एकताको कुरा उठाएकाले फेरि वाम एकता हुने कुरालाई नकार्न सकिँदैन । बिहीबार साँझसम्म सार्वजनिक परिणाम अनुसार नेपाली कांग्रेसले प्रत्यक्षमा ३२ ठाउँमा जितेको छ भने २१ स्थानमा अग्रता हाँसिल गरेको छ । त्यस्तै एमालेले २० ठाउँमा जितेको छ भने २७ ठाउँमा अग्रता हाँसिल गरेको छ । माओवादी केन्द्रले ९ ठाउँ जितेको छ भने ८ स्थानमा अग्रता हाँसिल गरेको छ ।
त्यस्तै समानुपातिक तर्फ एमालेले ६ लाख ३७ हजार मत पाएको छ भने कांग्रेसले ५ लाख ७२ हजार मत पाएको छ । माओवादी केन्द्रले २ लाख ७८ हजार मत पाउदा स्वतन्त्र पार्टीले ३ लाख ९० हजार मत पाएको छ ।
