काठमाडौं । अमेरिकाको राजनीतिक मामिला हेर्ने उपविदेशमन्त्री भिक्टोरिया नुल्यान्ड आइतबार नेपाल आइपुगेकी छन् । वासिङ्टन डिसीबाट सिधै नेपाल आएकी उपमन्त्री नुल्यान्डले आफ्नो दुईदिने भ्रमणमा प्रधानमन्त्री पुष्पकमल दाहाल प्रचण्ड, परराष्ट्रमन्त्री विमला राई पौड्याललगायतका नेतासँग भेटवार्ता गर्ने कार्यतालिका छ ।

उनले विशेष गरेर अमेरिकी साझेदारीको बृहत् एजेन्डाको विषयमा छलफल गर्नेछिन् । नेपालमा नयाँ सरकार गठन भएपछि अमेरिकाबाट भएको यो उच्चस्तरीय भ्रमण हो । उपविदेशमन्त्री नुल्यान्डले नेपालमा रहँदा अमेरिकाले नेपालमा गरेको साझेदारको कार्यक्रमको विषयमा छलफल गर्नेछिन् । उनले नेपाली कांग्रेसका सभापति शेरबहादुर देउवा, सत्तासाझेदार दलका नेता तथा एमालेका अध्यक्ष केपी शर्मा ओलीसँग भेटवार्ता गर्ने कार्यतालिका रहेको कूटनीतिक स्रोतले जानकारी दियो ।

नयाँ सरकार गठनपछि अमेरिकाको पहिलो उच्चस्तरीय भ्रमण

उपमन्त्री नुल्यान्ड बदलिँदो भूराजनीतिक परिवेशसँगै वर्तमान अवस्थामा नेपालको वस्तुस्थिति बुझ्न यहाँ आएकी हुन् । अमेरिकाको एक अनुभवी कूटनीतिज्ञसमेत रहेकी उपमन्त्री नुल्यान्डले राजनीतिक दलका धारणा बुझ्ने छन् । साथै नेपालमा अमेरिकाले सहयोग गरेको साझेदार कार्यक्रमको वस्तुस्थितिको विषयमा पनि जानकारी लिने छिन् ।

काठमाडौंस्थित अमेरिकी दूतावासका अनुसार उपमन्त्री नुल्यान्डको भ्रमणमा द्विपक्षीय सम्बन्धलाई थप उजागर गर्न सरकारी अधिकारीसँग भेटवार्ता हुनेछ । ‘नेपाल भ्रमणको क्रममा उहाँले सरकारका नेतृत्वकर्तासँग भेटघाट गरी दुई देशबीचको बलियो दैत्य सम्बन्धमाथि जोड दिनुहुनेछ,’ काठमाडौंस्थित अमेरिकी दूतावासले भनेको छ, ‘साथै उहाँले नेपालको अनुपम सांस्कृतिक सम्पदाको अनुभव पनि सँगाल्नुहुनेछ ।’ उनले पाटन दरबार स्क्वायर भ्रमण गर्ने कार्यक्रम पनि छ ।

लामो कूटनीतिक अनुभव भएकी उपमन्त्री भिक्टोरिया नुल्यान्ड अमेरिकामा तीन राष्ट्रपतिसँग काम गरिसकेकी छन् । कूटनीतिक क्षेत्रमा लामो अनुभव रहेकी उनले अप्रिल २०२१ मा राजनीतिक मामिलाका लागि राज्यका उपसचिवका रूपमा शपथ लिएकी थिइन् । यसअघि उनी वासिङटन, डीसीमा रहेको विश्वव्यापी रणनीतिक सल्लाहकार र व्यावसायिक कूटनीति फर्म अलब्राइट स्टोनब्रिज समूहमा वरिष्ठ सल्लाहकार थिइन् ।

उनी ब्रुकिग्स इन्स्टिच्युसनमा गैरआवासीय वरिष्ठ फेलो, येल विश्वविद्यालयमा भव्य रणनीतिमा प्रतिष्ठित अभ्यासकर्ता, र लोकतन्त्रका लागि नेसनल एन्डोमेन्ट बोर्डको सदस्य पनि थिइन् । ३३ वर्षसम्म अमेरिकी कूटनीतिज्ञ, राजदूत नुल्यान्डले राष्ट्रपति ओबामा र सचिव केरीको नेतृत्वमा सेप्टेम्बर २०१३ देखि जनवरी २०१७ सम्म युरोपेली र युरेसियन मामिलाका लागि सहायक सचिवको रूपमा सेवा गरिन् । उनी सेक्रेटरी हिलारी क्लिन्टनको कार्यकालमा स्टेट डिपार्टमेन्टको प्रवक्ता र राष्ट्रपति जर्ज डब्लु बुसको दोस्रो कार्यकाल, २००५÷०८ मा नाटोका लागि अमेरिकी राजदूत थिइन् ।