खोटाङ । खोटाङका गायक तथा संगीतकार पृथी जिम्बाको म्यूजिक भिडियो सार्वजनिक भएको छ । साकेला गाउँपालिका–३ खिदिमा घर भइ हाल यूके रहेका गायक तथा संगीतकार जिम्बाको ‘राजाको भैंसी तीनथुने’ बोलको म्यूजिक भिडियो सार्वजनिक गरिएको हो । पाँच मिनेट ४९ सेकेण्डको म्यूजिक भिडियो सोमबार ओएसआर डिजिटल यूटुव च्यानलबाट सार्वजनिक गरिएको हो ।

राजनराज सिवाकोटीको शव्द र संगीत रहेको गीतमा स्वयं गायक जिम्बा र गायीका सुनिता थेगिमको स्वर रहेको छ । म्यूजिक भिडियोमा कलाकार निरञ्जली लामा, बिश्वबिचित्र तामाङ लगायतको अभिनय हेर्न सकिन्छ । म्यूजिक भिडियोको डाइरेक्टर÷कोरियोग्राफर केशवराज भाट तथा एरेञ्जर देबेस राई छन् । प्रिज्म स्टुडियोमा रेकर्ड गरिएको गीतको मिक्स-मास्टरिङ श्यामस्वेत रसाइलीले गरेका छन् ।

मोफसलमा बसेर संगीत साधनामा छुट्टै परिचय बनाएका जिम्बाको यसअघि २०७३ सालमा ‘यस्तै रैछ जिन्दगानी’ बोलको गीत नेपाली सांगीतिक क्षेत्रमा आएको थियो । पेशाले शिक्षक जिम्बाको ‘यो देशमा एउटा आन्दोलन चाहिन्छ’ बोलको गीत चर्चित छ । गायक तथा संगीतकार जिम्बा शिक्षण सेवाबाट असाधारण विदामा यूके पुगेका हुन् । एकल लोक आधुनिक गिती एल्बम ‘शुसाङ’ बजारमा ल्याइसकेका गायक जिम्बाले हालसम्म दुई दर्जनभन्दा बढि गीतमा स्वर दिइसकेका छन् ।