प्रचण्डको अस्थिरताले एमालेसँग मिल्नुप-यो: थापा

इटहरी । नेपाली कांग्रेसका महामन्त्री गगन थापाले प्रधानमन्त्री पुष्पकमल दाहाल (प्रचण्ड)को अस्थिर चरित्रका कारण कांग्रेस र एमाले मिल्नुपर्ने अवस्था आएको बताएका छन् । बिहीबार नेपाली कांग्रेस इटहरीको नगर सम्मेलनमा मन्तव्य राख्दै महामन्त्री थापाले वर्तमान प्रधानमन्त्रीसमेत रहेका माओबादी केन्द्रका अध्यक्ष प्रचण्डको अस्थिर चरित्र र उपद्रोका कारण कांग्रेस र एमाले मिल्नुपर्ने अवस्था आएको बताएका हुन् ।

‘अर्थतन्त्रको बेहाल भएको अवस्थामा बजारले विश्वास गुमाएको छ । यो बेलामा कांग्रेस र एमाले एक हुनुपरेको हो,’ उनले थपे, ‘यो संवाद प्रतिपक्षमै बसेर पनि हुन्थ्यो होला, तर प्रचण्डले धेरै चकचक नगर्नुभएको भए ।’

उनले संवैधानिक व्यवस्थालाई जोगाउनका निम्ति, पुनरावलोकन गर्नका निम्ति, एमालेसँग मिलेर सरकार गठन गर्नुपरेको अवस्था थियो । उनले भने, ‘मेरो चाहना २०८४ सालसम्म कांग्रेस प्रतिपक्षमा बस्नुपर्छ भन्ने थियो । तर, अनुमानले इच्छालाई जितेकोजस्तो भयो ।’ उनले प्रचण्ड चकचक गर्ने, उपद्रो गर्ने र अस्थिर चरित्र भएको संज्ञा दिए । थापाले भने, ‘प्रचण्डको उपद्रोबाट देउवा र ओली झुकिसक्नु भएको थियो, कोही झुक्न बाँकी थिएन । चकचक यति धेरै भइसकेको थियो कि उहाँले सम्हाल्न सक्ने अवस्था थिएन ।’

उनले गृहमन्त्रीसमेत रहेका रवि लामिछानेलाई फाइल खोल्नसमेत चुनौती दिए । ‘साथी अझै मन्त्रालयमा हुनुहुन्छ, अझै दुईचारदिन बस्नुहुन्छ । जति फाइल खोल्नु छ खोले हुन्छ, जजसको खोल्नु छ खोले हुन्छ,’ उनले भने, ‘अब बजारमा गएर हामीले त यो काण्ड खोल्दैथियौँ भनेर भन्नुहुन्छ, जनतालाई झुक्याउने अवस्था बन्न सक्छ ।’ माओवादी र रास्वपाले थारु, मुस्लिम, दलित, समानुपातिक प्रणाली खोसिने भयो भनेर जनतालाई झुक्याउनसक्नेसमेत उनले बताए । ‘अब भ्रष्टाचारको निम्ति शून्य सहनशीलताका साथ आउने सरकारले काम गर्नुपर्छ, त्यसमा कांग्रेसका कोही कसैले गल्ती गरेमा छुट हुनेवाला छैन ।’ उनले भने ।

उनले अब कांग्रेसबाट सरकारमा सहभागी हुने कसैलाई पनि गल्ती गर्ने छुट नहुनेसमेत बताए । पटकपटक मन्त्री भएका मान्छेले यो पटक विश्राम लिनुपर्ने र अब मन्त्री हुनेहरू जोस पनि भएको, होस पनि भएको र परणाम दिनसक्ने भोक भएको मान्छेलाई लैजान आवश्यक रहेको उनको भनाइ छ । उनले कांग्रेस र एमालेको गठबन्धनले सरकार गठन भएसँगै संविधान संशोधन हुने र संविधान संशोधनका निम्ति माओबादीसहित अरु दलको पनि आवश्यकता पर्ने बताए ।

एमाले अध्यक्ष केपी ओलीले ठीक ढंगले हेक्का राखेर अघि बढ्नुपर्ने नत्र अप्ठ्यारो हुनेसमेत उनको चेतावनी थियो । थापाले भने, ‘केपी ओलीले कांग्रेसको इज्जतको ख्याल गर्नुपर्छ । कांग्रेस देशको सबैभन्दा ठूलो पार्टी हो, त्यसैले कांग्रेससँग सहकार्य गर्दा कांग्रेसलाई सम्मान र इज्जत गर्नुपर्छ, यो ख्याल गर्नुपर्छ ।’

यसैगरी केन्द्रीय सरकारमा २५ जना मन्त्री रहने व्यवस्था रहेको तर अब भने १० जना मात्रै मन्त्री बनाउनुपर्ने अवस्थासमेत आएको उनले बताए । उनले थने, ‘देशको खर्च घटाउन प्रदेश खारेज गरिदिउँ भनेर सहजै भनिन्छ । प्रदेशको कारण महंगो भयो भन्छौँ, कसैले पनि हिसाब पल्टाएर हेरेका छैनौँ । तर, प्रदेशमा पाँचभन्दा बढी मन्त्री बनाउन पाइदैँन, संघमा १० भन्दा बढी मन्त्री बनाउन पाइदैँन । यत्रो धेरै वडाध्यक्ष र वडासदस्य चाहिदैँन भनेर संविधान संशोधन गर्नुपर्छजस्तो लाग्छ ।’

कांग्रेसको विधानतः दुईपटकभन्दा बढी सभापति बन्न नपाइने लेखिएको र अब संविधानमा पनि दुईपटक भन्दा बढी प्रधानमन्त्री बन्न नपाइने लेखिनुपर्ने थापाले बताए । उनले निर्वाचित सांसद मन्त्री बन्न नसक्ने पनि बताउनुपर्ने बताए ।

उनले कांग्रेस इटहरीका सभापति तथा मेयर हेमकर्ण पौडेललाई नगरबासीसँगको सम्बन्ध सुमधुर बनाउनसमेत सुझाव दिए । भने, ‘पार्टीका साथी र निर्वाचित भएको व्यक्तिको सम्बन्ध नङ र मासुको जस्तो हुनुपर्छ । निर्वाचित भएको जो सुकै होस्, हाम्रो तागत भनेको पार्टीकै साथीहरू हुन् ।’

कार्यक्रममा कांग्रेस केन्द्रीय सदस्य राजीव कोइराला, राजीव ढुंगाना, कल्पना गच्छदार, लक्ष्मी खतिवडालगायतले सम्बोधन गरेका थिए ।

तपाइको प्रतिक्रिया
(Visited 131 times, 1 visits today)

Ads Space Available

epaper

भर्खरै

गत वर्ष ७० अर्बको विदेशी लगानी प्रतिबद्धता

कुरी-कुरी

राजधानी राष्ट्रिय दैनिक:कुरी-कुरी – असोज ८, २०८०
राजधानी राष्ट्रिय दैनिक:कुरी-कुरी – असोज ८, २०८०
मालिकामा एमालेविरुद्ध पाँच दलीय गठबन्धन